سەندیکا ڤەگوھاستنێ کرێیا ترۆمبێلان کێم کر

ئەڤرۆ نيوز:
پشتی تێکچوونا رەوشا دارایی و ئابووری ل سەرانسەری ھەرێما کوردستانێ، ھەموو بزاڤ دھێنەکرن کو کریێن ترۆمبێلان بھێنە کێمکرن، سەرۆکێ سەندیکا ڤەگوھاستنێ ل دھۆکێ دەستپێشخەریەک پێشکێش کر و کرێیا ترۆمبێلێن ڤەگوھا.
محەمەد شیکەی سەرۆکێ سەندیکا ڤەگوھاستنێ ل دھۆکێ بۆ ئەڤرۆ دیارکر کو دوھی 31/1/2016 ب مەرەما کێمکرنا بھایێ ترۆمبێلان کۆمبوونەک ل گەل شوفێران ئەنجام دایە و ب تایبەتی ئەوێن قوتابیان دگەھینە قوتابخانێ و ل ھەر دو قووناغێن ئامادەیی و زانکۆیان و ھەر پشتی بریارێ ئەڤە دێ کەڤیتە د بیاڤێ بجھئینانێ دا.
شیکەی گۆت ژی “ئەڤ کارە ھاتەکرن وەک پێشمەرگە ل بەرۆکێن شەری و ئەڤ ھاریکاریە سەر خاترا ڤی پێشمەرگەی و زارۆیێن شەھیدان ھاتەکرن و ئەڤە ژی پشتەڤانیەکە بۆ حوکمەتا مە و خوە دبینن پشکەک ژ چارەسەریێ”.
محەمەد شیکەی سەرۆکێ سەندیکا ڤەگوھاستنێ ل دھۆکێ ئەو چەندە ژی دیار کر کو ھەر ترۆمبێلا بۆ نموونە 20 ھزار دیناران ژ قوتابیەکی وەرگرتبن دێ بۆ کەتە 15 ھزار دینار و ھەکە 25 ھزار دینار وەرگرتبن دێ بۆ کەتە 20 ھزار دینار و گۆت “دبینم ئەڤ کارە د ئەڤان کاودانان دا گەلەک دێ باش بیت”.

کۆمێنتا تە