شاره‌زايه‌كا ئابوورى:به‌غدا ب 36 مليار دۆلاران قه‌ردارا هه‌رێما كوردستانێ يه
ئه‌ڤرۆنيوز:
شاره‌زايه‌كا ئابوورى وشيره‌تكارا به‌رێ يا بازرگانى ل وه‌زاره‌تا كار وكاروبارێن ئه‌مريكى، تارا شوان، دياركر كو هه‌رێما كوردستانێ ب 28 مليار دۆلاران يا قه‌رداره كو 8 مليار دۆلار ژوان مووچێن پاشكه‌فتى يێن فه‌رمانبه‌رانه وعيراق ژى 36 مليار دۆلاران قه‌ردارا هه‌رێمێ يه.
تارا شوان كو نوكه به‌رپرسا ئه‌نستيۆتا ئابوورى (ئه‌مريكى – كوردى) يه گۆت” ل دووڤ وان داتايێن ل ناڤه‌ندێ ئابوورى يێن جيهانى وناڤخوه‌يى ل كوردستانێ ب ده‌ست مه گه‌هشتين، حوكمه‌تا هه‌رێما كوردستانێ ب كۆژمێ 28 مليار دۆلاران يا قه‌رداره”.
ل دۆر وان قه‌ران، تارايێ بۆ وشه گۆت” قه‌رێن ناڤخوه‌يى يێن هه‌ين ويێن توركيا ويێن عيراقێ ويێن كۆمپانيان ژى نه، يێن ناڤخوه‌يێ 8 مليار دۆلارێن مووچێن 7 هه‌يڤانه ئه‌وێن نه‌هاتينه دان وپه‌شكه‌فتێ 21 هه‌يڤانه يێن فه‌رمانبه‌ر ومووچه‌خۆران وقه‌رێن قونته‌رچيان كو سێ مليار دۆلارن وب گۆره‌ى ئاخڤتنێن ئه‌ردۆگانى وعه‌بادى، حوكمه‌تا هه‌رێما كوردستانێ ب كۆژمێ 4 مليار دۆلاران قه‌ردارا توركيايه، ديسا حوكمه‌تا هه‌رێمێ ملياره‌ك و500 مليۆن جۆلار قه‌ر ب شێوێ قست ژ توركيا وه‌رگرتيه”.
ل دۆر قه‌رێن عيراقێ وكۆمپانيان ل سه‌ر هه‌رێما كوردستانێ، تارايێ گۆت” حوكمه‌تا هه‌رێمێ پێنج مليار دۆلار قه‌ر ژ به‌نكێن عيراقى ئه‌وێن ل هه‌رێمێ كوردستانێ ب شێوێ كاش يێن راكێشاين وقه‌رێن كۆمپانيا رۆزنه‌فت يا رووسي سێ مليار دۆلارن كو حوكمه‌تا هه‌رێمێ ژ وى قه‌رى ملياره‌ك و300 مليۆن دۆلار يێن داين، قه‌رێن كۆمپانيا ليتاسۆك 80 مليۆن دۆلارن وقه‌رێن كۆمپانيا ڤيتۆل ئێك مليار دۆلارن ويێن كۆمپانيا كه‌ڤه‌ر 500 مليۆن دۆلارن ويێن كۆمپانيا گرين گۆر ژى 500 مليۆن دۆلارن”.
تارايێ ئاماژه دا كو ب گۆره‌ى وان دووڤچوونێن ژلايێ وانڤه هاتينه ئه‌نجامدان، حوكمه‌تا عيراقێ قه‌ردارا حوكمه‌تا هه‌رێما كوردستانێ يه ب كوژمێ 36 مليار و50 مليون دۆلاران ئه‌وژى قه‌رێ بودجه‌ى كو 12 مليار دۆلارن وژ سالا 2014 هه‌تا سالا 2017 ب چو جۆره‌كى پشكا بودجا هه‌رێما كوردستانێ ژلايێ عيراقێ ڤه نه‌هاتيه هنارتن وحوكمه‌تا عيراقێ ب 50 مليۆن دۆلارێن فرۆكخانه‌يان قه‌ردارا حوكمه‌تا هه‌رێما كوردستانێ يه، ديسا حوكمه‌تا عيراقێ دفروشتنا په‌ترۆلێ دا ب 20 مليار دۆلاران قه‌ردارا هه‌رێما كوردستانێ وپێدڤيه وى كوژمى بده‌ته هه‌رێمێ، ديسا ل دووڤ رێككه‌فتنا دناڤبه‌را حوكمه‌تا هه‌ريمێ وحوكمه‌تا عيراقێ دا ل دۆر پێشمه‌رگه‌ى، پێدڤيه به‌غدا سالانه ئێك مليار دۆلاران خه‌رج بكه‌ت، به‌لێ ئه‌ڤه چار ساله نه‌هاتيه خه‌رجكرن، ئانكو حوكمه‌تا عيراقێ ب كوژمێ 4 مليار دۆلاران قه‌ردارا حوكمه‌تا هه‌رێما كوردستانێ يه دوى بياڤى دا، ئه‌ڤه چار ساله ژى پێدڤيێن ساخله‌ميێ ژعيراقێ ب شێوه‌كێ به‌رده‌وام تنێ (60% هه‌تا 70%) بۆ هه‌رێما كوردستانێ هاتينه هنارتن و 40% ب به‌رده‌وامى نه‌هاتينه هنارتن، ئه‌ڤه ژى كوژمه‌كێ خه‌يالى يێ پاره‌يه.
