شاره‌زايه‌كێ ئابوورى مه‌ترسيه‌كێ ل دۆر په‌ترۆلا هه‌رێمێ ئاشكه‌را دكه‌ت
ئه‌ڤرۆ نيوز:
شارەزایەکێ ئابووری ئاشکرا کر کو ھەکە حوکمەتا ھەرێما کوردستانێ سەربەخوە پەتڕۆلێ ب فرۆشیت و داھات یێ شەفاف بیت بۆ سالا داھاتی رەوشا ھەرێما کوردستانێ دێ ژ ئەڤ سالە باشتربیت، بەلێ بەرۆڤاژی ھەکە پلان نەھێتە گھۆرین و داھات یێ شەفاف نەبیت دێ د سالەکا دژوارا ئابووری دا دەربازبین و گۆت: “کارەساتە ھەرێم د ڤێ قووناغێ دا پەتڕۆلا خوە رادەستی بەغدا بکەت”.
ئیدریس کۆچەر، شارەزایی ئابووری بۆ رۆژناما ئەڤرۆ دیار کر کو ئەڤ سالە خەلکێ ھەرێما کوردستانێ سالەکا دژوارا ئابووری دەرباز کر و ھەکە چاکسازی نەھێنەکرن و حوکمەت پلانێن خوە نە گھۆریت سالا بھێت دێ خرابتر بیت، بەلێ ھەکە حوکمەت پلانەکا ب رێک و پێک ب دانیت و داھاتێ پەترۆلێ یێ شەفاف بیت سالا بھێت دێ ژ ئەڤ سالە باشتر بیت، چونکی حوکمەت دشێت بەرھەمێ خوە یێ پەتڕۆلێ زێدەکەت و ب ڤێ چەندێ دێ داھاتەکێ باشتر کەڤیتە د دەستێن حوکمەتێ دا و ئەو داھات دێ ب شێوەکێ باشتر ھێتە بکارئینان و گھۆرین دێ کەڤیتە رەوشا ئابووریا وەلاتیان و گۆت: “ب دیتنامن کەرتێن ئابووری ل ھەرێما کوردستانێ داکەفتینە و بووینە ئەگەرێ نەمانا بازاری ب گشتی و ب تایبەت بازارێ ئەرد و خانیان، ژ لایەکێ دی ڤە رەوشا سیاسی کارتێکرن ل سەر لاوازبوونا بازاری ھەبوویە، چونکی ھەکە ئالۆزیێن سیاسی بھێنە چارەسەرکرن و پەیوەندیێن دناڤبەرا لایەنێن سیاسی دا باشتر لێ بھێن دێ کارتێکرنەکا باش ل سەر گەشەکرنا بازاری ھەبیت”.
ناڤھاتی ئاماژە دا وێ چەندێ کو پێدڤیە حوکمەتا ھەرێما کوردستانێ باش ھزرا خوە دقانوونا بودجێ عیراقێ دا بکەت، چونکی چو مفا بۆ خەلکێ کوردستانێ تێدا نینە و ھەرێما کوردستانێ ئەزموونەکا نەخوەش دگەل ھنارتنا بۆدجێ ھەیە و چو سالان بەغدا بۆدجا ھەرێمێ 17% نەدایێ و گۆت: “ھەکە بھێت و ھەرێما کوردستانێ ئەڤ جارە ژی پەتڕۆلا خوە رادەستی بەغدا بکەت دێ ب دەردێ سالێن بۆری چیت و مووچێ فەرمانبەران و ھێزێن پێشمەرگەی نا مەزێخیت ژ بەر ڤێ چەندێ گەلەک باشترە پێنگاڤا سەربەخۆیا ئابووری بھێتە ھاڤێتن، چونکی ھەکە ھەرێم ب شێوێ سەربەخۆ پەترۆلێ ب فرۆشیت دێ پتر داھات گەھیتێ ژ داھاتێ بەغدا، بەلێ ب مەرجەکی داھاتێ پەترۆلێ بھێتە زەلالکرن و بادەکا پەتڕۆلێ ببیتە بادەکەکا زەلال ل بەر چاڤێن لایەنێن سیاسی و وەلاتیان”.
ل دووماھیێ ناڤھاتی خویا کر کو کارەساتە ھەرێم د ڤێ قووناغێ دا پەتڕۆلا خوە رادەستی بەغدا بکەت، چونکی نوکە بەغدا ب خوە یا د قەیرانان دا دەرباز دبیت.
