شارەزایەکێ لەشکری: لەشکرێ عیراقێ ب تنێ ناڤ یێ مایی
ئەڤرۆ:
شارەزایەکێ لەشکری ھەمبەر خوە ئێکلانەکرنا کوردان بۆ پشکداریێ دئازادکرنا باژێرێ مووسلێ دا چەندین ھۆکاران د دەتە دیارکرن، دیسان ئاشکرا دکەت کو کونترۆلکرنا پارێزگەھا سەلاحەدینێ کو چەندین رۆژە ئۆپەراسیۆنێن لەشکری ژلایێ لەشکرێ عیراقێ و حەشد شەعبی ڤە دەست پێکریە دێ یا ب زەحمەت بیت.
عەقید روکن ئاراز ئەرشەد عەبدولغەفار، ماستەر ب زانستێن لەشکری، بۆ ئەڤرۆ گۆت”چەندین ھۆکار یێن ھەین کو ھەتا نوکە کوردان خوە ئێکلانەکری یە بۆ پشکداریێ د پرۆسا ئازادکرنا مووسلێ دا، ئەوژی ھۆکارێن تەکتیکی، پلاندانانێ و ستراتیجی نە، ھەتا نوکە یا دیار نینە پشتی ئازادکرنێ دێ بۆ کوردان چ ھێتەدانان، کوردان ل سالا ٢٠٠٣ ئەزموونێن مووسل و کەرکووکێ یێن ھەین کو ب دەستێ کوردان ھاتبوونە ئازادکرن”.
. ھێشتا ژی گۆت” گەلەک گرنگە مووسل بھێتە ئازادکرن، چونکە چەند د دەستێ تیرۆرستان دا بیت دێ ھەر گەف ھەبن بۆ دەڤەرێن رۆژئاڤایێ زومارێ و شنگالێ و و ژلایێ رۆژھەلاتێ ڤە بۆ کەرکووکێ
عەقید روکن ئارازی خویاکر”مووسل ب کوردان و لەشکرێ عیراقێ و حەشەد شەعبی بتنێ ناھێتە رزگارکرن، دڤێت رێکخەری ھەبیت و ژوورەکا پۆپەراسیۆنان بھێتە پێکئینان و بەردەوام ل گەل شەری و ھێرشێ دابیت و روونشتن نە ل بەغدا بیت، بەلکو ل مەیدانا شەری بیت، ب دیتنا من دێ داعش شەری ل مووسلێ کەت.
ل دۆر شەرێ لەشکرێ عیراقێ و حەشەد شەعبی ل گەل تیرۆرستێن داعشێ ل پارێزگەھا سەلاحەدین، ناڤبری گۆت” ب ھژمار حەشەد شەعبی و لەشکرێ عیراقێ گەلەکن ، لێ مەشق و راھێنانێن لەشکری کارتێکرنا خوە یا ھەی و ئازادکرنا وێ پارێزگەھێ دێ گەلەک ڤەکێشیت. وەکو تەکتیک دبیت داعش گەلەک جھان بەردەت، ھەکە ھاتە کونترۆلکرن ژلایێ لەشکرێ عیراقێ ڤە دبیاڤێ لەشکری دا کارتێکرنەکا مەزن دێ ل داعش دێ ھێتەکرن ،چونکە گەلەک رێ دێ ل داعشێ ھێنە گرتن” . ھەمبەر شیانێن لەشکرێ عیراقێ ژی گۆت” لەشکرێ عیراقێ ب تنێ ناڤ یێ مای و ئەڤا ھەی ژی یا د دەستێ مەرجەعیێن دینی دا، ھەکە ھندەک ئەفسەرێن چالاک ژی ھەبن ئەو کارتێکرن نینە کو گوھۆرین د ھەڤسەنگیێ دا بھێنەکرن”.
ل دووڤ بۆچوونا ڤی شارەزایێ لەشکری” ھێزا داعشێ بەر ب لاواز بوونێ ڤە یا دچیت ، ھندەک باژێر یێن ماین کو خەلکێ وان یا خوە ب داعشێ ڤە گرێدای و ئەڤە دێ مینیت ل سەر حوکمەتا عیراقێ کا دێ چەوا شێت ڤی خەلکی کێشیتە نێزیکی خوە”.
ناڤبری ئاماژە دا کو پێشمەرگێ کوردستانێ پێدڤی ب زێدەتر مەشقێ یە و دیسان ئەو چەکێ سەرکردێن کورد بۆ پێشمەرگەی داخاز دکەن وەک تانک و زریپۆشان ھەتا نوکە پێشمەرگەی رۆلەکێ مەزن یێ پێ گێرای.
