شام: هەتا تورکیا داخوازیێن مە قەبوول نەکەت چو دانوستاندنان ناکەین
ئەڤرۆ
ئەندامەکێ پەرلەمانێ سووریێ راگەهاند، وەلاتێ وی ب رێیا رۆسیا چەندین داخوازی ل تورکیا کرینە و هەروەسا ب رەنگەکێ ئاشکرا داخواز ژ تورکیا هاتیە کرن دڤێت وان داخوازیان قەبوول بکەت، هەتا ئەنقەرە داخوازیێن سووریێ بجهـ نەئینیت ئەو چو دانوستاندنان ل گەل تورکیا ناکەن.
عەلی ئەلجادان ئەندامێ پەرلەمانێ سووریێ د داخۆیانیەکێ دا بۆ ئاژانسا سپوتینگ یا رۆسیا راگەهاند، د سەرەدانا ڤێ دویماهیێ یا بەشاری ئەسەدی بۆ رۆسیا ئێک ژ تەوەرێن سەرەکی یێن دانوستاندنان بابەتێ پەیوەندیێن تورکیا و سووریێ بوویە، رۆسیا یا رژدە تورکیا و سووریێ پەیوەندیێن خۆ ئاسایی بکەن، لێ ژ بۆ هندێ شامێ چەندین داخوازی و مەرج پێشکێشی ئەنقەرە کرینە، هەتا تورکیا وان داخوازیان قەبوول نەکەت شام یا بەرهەڤ نینە پەیوەندیێن خۆ ل گەل تورکیا ئاسایی بکەت و گۆت: (نها تورکیا پشکەک ژ ئاخا سووریێ داگیر کریە، تورکیا هەتا نها ژی پشتەڤانیێ ل گرۆپێن چەکدار دکەت، رەوشا دەڤەرێن باکورێ سووریێ یێن ل ژێر کۆنترۆلا تورکیا گەلەک خرابە، ل گۆر قانوونێن نێڤدەولەتی تورکیا داگیرکەرە و دڤێت د زووترین دەم دا تورکیا هەمی هێزێن خۆ ژ ئاخا مە ڤەکێشت، ژ بۆ هندێ ژی نابیت تورکیا چو مەرج هەبن، سووریێ دەولەتەک سەربخۆیە و دڤێت تورکیا رێزێ ل سەروەریا سووریێ بگریت).
ئەندامێ پەرلەمانێ سووریێ ئەو یەک ژی دیار کریە، ئەو باش دزانن نها تورکیا بەر ب هەلبژارتنان ڤە دچیت، ئەنقەرە دڤێت بابەتێ ئاساییکرنا پەیوەندیێن خۆ ل گەل شامێ وەکو کارتەکێ د هەلبژارتنان دا بکار بینیت، لێ ئەو یەک ژ ئالیێ شامێ ڤە ب چو رەنگەکێ ناهێتە قەبوول کرن و گۆت: (ئێک ژ خالێن دی یێن هەری گرنگ ژی بابەتێ گرۆپێن چەکدارە، نها تورکیا پشتەڤانیێ ل چەندین گرۆپێن چەکدار و تیرۆرست دکەت، وان گرۆپان د چەند سالێن بۆری دا تاوانێن گەلەک مەزن دەرحق خەلکێ سووریێ کرینە، دڤێت ئێدی تورکیا ب فەرمی دەست ژ پشتەڤانیا وان گرۆپێن تیرۆرستی بەردەت و ب فەرمی ڤێ یەکێ بۆ رایا گشتی ئاشکرا بکەت، هەتا تورکیا تشتەک وەسا نەکەت شام ژی یا بەرهەڤ نینە ل گەل تورکیا دەست ب قۆناغەکا نوی بکەت).
چاڤدێرێن سیاسی دیار دکەن رۆسیا داخواز ژ بەشار ئەسەدی کریە د زووترین دەم دا ل گەل ئەردۆغانی دەست ب قۆناغەکا نوی بکەت، لێ هەتا نها ئەو یەک ژ ئالیێ بەشار ئەسەدی ڤە نەهاتیە قەبوول کرن، چونکی بەشار ئەسەد دزانیت نها پێگەهێ جەماوەری یێ ئەردۆغانی د ناڤ تورکیا دا گەلەک لاواز بوویە، ژ بەر هندێ ژی بەشار ئەسەد نەڤێت ئەردۆغان بابەتێ ئاساییکرنا پەیوەندیێن ل گەل شامێ وەکو کارتەکێ ل دژی ئۆپۆزسیۆنێ بۆ هەلبژارتنان بکار بینیت، بەلکو بەشاری دڤێت بزانیت کا دێ پشتی هەلبژارتنان کێ بیت سەرۆک کۆمارێ تورکیا، سەرۆکێ رژێما سووریێ دڤێت پشتی ئەنجامێن هەلبژارتنان هاتنە راگەهاندن ل گۆر راستیا هەی سەرەدەریێ ل گەل دەستهەلاتا نوی یا تورکیا بکەت.
