شانده‌كێ بلندێ حوكمه‌تا هه‌رێمێ ئه‌ڤرۆ دێ چيته به‌غدا
ئه‌ڤرۆ نيوز:
شانده‌كێ بلندێ حوكمه‌تا هه‌رێما كوردستانێ، ب سه‌رۆكاتيا مه‌سرور بارزانى، سه‌رۆكێ حوكمه‌تا هه‌رێما كوردستانێ سه‌ره‌دانا به‌غدا كه‌ت و بڕياره ل گه‌ل هه‌رسێ سه‌رۆكاتيێن عيراقێ كۆم ببيت.
ب گۆره‌يى پێزانينان شاند دێ ب سه‌رۆكاتيا مه‌سرور بارزانى سه‌رۆكێ حوكمه‌تا هه‌رێما كوردستانێ بيت و هه‌ر ئێك ژ قوباد ته‌له‌بانى جێگرێ سه‌رۆكێ حوكمه‌تێ، فه‌رسه‌ت ئه‌حمه‌د وه‌زيرێ داد، رێبه‌ر ئه‌حمه‌د، وه‌زيرێ ناڤخۆ، شوره‌ش ئيمساعيل وه‌زيرێ پێشمه‌رگه، ئاوات شێخ جه‌ناب وه‌زيرێ دارايى و ئابوورى و فه‌وزى حه‌ريرى سه‌رۆكێ ديوانا سه‌رۆكاتيا هه‌رێما كوردستانێ دێ ئه‌ندامه‌تيا شاندى كه‌ن. ل به‌غدا ژى شاندێ ناڤبرى دێ ل گه‌ل هه‌رسێ سه‌رۆكاتيێن هه‌رێما كوردستانێ كۆم بيت.
به‌رنامێ كار و كۆمبوونێن شاندێ حوكمه‌تا هه‌رێما كوردستانێ ب گۆره‌يى پێزانينێن ئه‌ڤرۆ نيوز دێ ل ده‌سپێكێ سه‌ره‌دانا به‌رهه‌م سالح سه‌رۆك كۆمارێ عيراقێ كه‌ن و ديدار و چاڤپێكه‌فتنێ ل گه‌ل ئه‌نجام ده‌نو پاشان ژى ل گه‌ل عادل عه‌بدولمه‌هدى سه‌رۆك وه‌زيرێن عيراقێ كۆم بيت و پاشان ژى ل گه‌ل محه‌مه‌د حه‌لبۆسى سه‌رۆكێ جڤاتا نوونه‌رێن عيراقێ كۆم بن.
بڕياره ئه‌ڤ سه‌ره‌دانه زێده‌تر يا هه‌ڤنياسينى بيت و د هه‌مان ده‌م دا، پرسا ده‌ڤه‌رێن كێشه‌دار، بوودجه و په‌ترۆل، كه‌ركووك و ئاواره ببنه هێڤێنێ سه‌ره‌دانا شاندێ هه‌رێما كوردستانێ.
د كۆمبوونا ئێكێ يا فه‌رمى يا جڤاتا وه‌زيرێن هه‌رێما كوردستانێ دا، دوهى 15ى تيرمه‌ها 2019ێ دا، بڕيار هاته دان وه‌كو نيه‌تپاكى شانده‌كێ هه‌رێما كوردستانێ سه‌ره‌دانا به‌غدا بكه‌ت بۆ ڤه‌ديتنا رێيێن گۆنجايى بۆ كێشێن هه‌لپسارتى د ناڤبه‌را هه‌ولێر و به‌غدا دا، د چارچۆڤێ دستوورى دا.
