شانده‌كێ هه‌ڤپشك يێ پارتى وئێكه‌تى گه‌هشته به‌غدا
ئه‌ڤرۆنيوز:
شانده‌كێ هه‌ڤپشكێ پارتى ديموكراتى كوردستان وئێكه‌تى نيشتمانى كوردستان بۆ دانوستاندنێ ل گه‌ل لايه‌نێن سه‌ركه‌فتى دهه‌لبژارتنێن په‌رله‌مانێ عيراقێ دا گه‌هشته به‌غدا.
شاندێ هه‌ڤپشكێ پارتى وئێكه‌تى ب سه‌رۆكاتيا فازل ميرانى ومه‌لا به‌ختيار پشكدارى دكۆمبوونێن لايه‌نێن سياسى يێن عيراقێ بوون.
شاندێ ناڤبرى ب سه‌رۆكاتيا فلزل ميرانى سكرتێرێ مه‌كته‌با سياسى يا پارتى ومه‌لا به‌ختيار به‌رپرسێ ده‌سته‌يا كارگێريا مه‌كته‌با سياسى يا ئێكه‌تيێ سه‌ره‌دانا به‌غدا كر ول گه‌ل سه‌رۆك كۆمارا عيراقێ كۆمبوو كو هه‌موو لايه‌نێن سياسى يێن عيراقى ل وێرێ بوون.
پشتى پشكداريكرن دكۆمبوونا سه‌رۆك كۆمارا عيراقێ فوئاد مه‌عسووم ل گه‌ل نوونه‌رێن لايه‌نين سياسى يێن عيراقى، مه‌لا به‌ختيار دداخۆيانيه‌كێ دا گۆت” دكۆمبوونێ دا هه‌موو لايه‌نان وه‌كو قۆناغه‌كا نوو سه‌حدكره عيراقێ وبه‌حس ل خوه‌نيشادانێن باشوورێ عيراقێ وئه‌نجامێن پرۆسا هه‌لبژارتنان هاتن به‌رچاڤكرن”.
ل دۆر پێكئينانا كابينا نوو يا حوكمه‌تا عيراقێ، مه‌لا به‌ختيار راگه‌هاند” هێشتا رێكه‌فتنا شيعان نه‌هاتيه كرن وسونه‌يان ژى خوه كۆم نه‌كريه، تنێ كورد ب تايبه‌تى پارتى وئێكه‌تى ب هه‌ڤپشكى پرۆژه‌ك يێ هه‌ى ومه خوه يا كۆمكرى ونوكه پێكڤه يێن هاتين ول داهاهتى ژى دێ هه‌ر پێكڤه بين”.
شاندێ هه‌ڤپشك يێ پارتى وئێكه‌تيێ دێ هچه‌ند رۆژان ل به‌غدا مينيت دێ ل گه‌ل لايه‌نێن سياسى يێن عيراقى ودێ دانوستاندنان ل دۆر پرسا پێكئينانا حوكمه‌تا نوو يا عيراقێ وپێگه وپشكا كوردان دناڤوێ حوكمه‌تێ دا ئه‌نجام ده‌ن.