شاندێ ئیمرالیێ: PKK ئامادەیە دەستان ژ چەکی بەردەت
ئەڤرۆ:
شاندێ ئیمرالیێ پشتی سەرەدانا خوە یا قەندیلێ راگەھاند کو پارتا کارکەرێن کوردستانێ بۆ سازکرنا کۆنگرێ چەکدانینێ ئامادەیە لێ حوکمەتا تورکیا و سەرۆک کۆمار خوە ژ مێزا دانوستاندنان پاشڤە کێشاینە و بزاڤێ دکەن کو گەریلا راکێشیننە مەیدانێن شەری و ئاشتی و قۆناغا چارەسەریێ قوربانا چەند دەنگێن نەتەوەپەرستان دکەن و داخواز ژ وەلاتیێن کورد و تورک کرن خوەدان ل ڤێ قۆناغێ دەرکەڤن.
ئدریس بالوکەن ئەندامێ شاندێ دانوستاندنان و جێگرێ سەرۆکێ کۆما HDP ل پەرلەمانێ تورکیا پشتی سەرەدانا شاندێ بۆ قەندیلێ ل ئامەدێ پرێس کۆنفرانسەک سازکرن و راگەھاندن کو قۆناغا ئاشتیێ ژ ئالیێ کوردان ڤە دھێتە بەردەوامکرن لێ ژ ئالیێ حوکمەت و سەرۆک کۆماری ڤە ھاتیە راوەستاندن و گۆت: (سەرکردێن پارتا کارکەرێن کوردستانێ ب ئاشکرا بۆ مە راگەھاندن کو ئەو ئامادەنە کۆنگرێ چاکدانینێ ساز بکەن لێ حوکمەتا تورکیا دخوازیت مە بکێشیتە د ناڤا شەرەکی نوو دا و ئەوە ژی دیار دکەت کو پارتا داد و گەشەپێدان، حوکمەت و سەرۆک کۆمارێ تورکیا خوە ژ قۆناغا ئاشتیێ ڤەکێشاینە و بەرھەڤیێ بۆ شەرەکی دژوار دکەن).
بالوکەن راگەھاند کو دۆرپێچا ل سەر سەرۆکێ PKK ژ ئالیێ سەرکردەیێن کورد و پارتا وان و گەلێ کورد ڤە ھێلا سۆرە و دڤێت رێڤەبەرێن تورکیا ئێدی یاریێ ب ئاگری نەکەن و گۆت: (د رەوشا نھا دا ئالیێ حوکمەتا تورکیا خوە ژ مێزا دانوستاندنان و قۆناغا ئاشتی و چارەکرنا پرسگرێکا کوردی ڤەکێشاینە و ئەوە ژی مەترسیە ل سەر پاشەرۆژا وەلات و ئالۆزیان ژ نوو ڤە زندی دکەن و دخوازن ب رێیا دروستکرنا ئالۆزیان دەنگێن نەتەوەپەرستان بۆ خوە کۆم بکەت و سیستەمێ تاکەکەسی ل تورکیا بجە بکەن، بۆ ڤێ چەندێ دڤێت گەلێ کورد و ئالیێن دیمۆکراسی خوازێن تورکیا پشتەڤانیەکا مەزنتر بدەنە قۆناغا ئاشتی و چارەکرنا پرسگرێکا کوردی و نەھێلن حوکمەت و سەرۆک کۆمار ئاگرەکی نوو ھلکەن).
ئەندامێ پەرلەمانێ تورکیا د پشکەکی دی یا ئاخڤتنا خوە دا ژی راگەھاند د کۆمبوونا وان یا شەش دەمژمێری دا سەرکردەیێن PKK داخواز ژ حوکمەتێ کرن، پێنگاڤان کو حوکمەتێ سۆز دابوو ب ئاڤێژیت د زووترین دەم دا بجە بکەت و گۆت: (ئالیێ کوردی د سەرخستنا قۆناغا ئاشتیێ دا رژدە و ھەکە ژ ئالیێ حوکمەتێ ڤە پێنگاڤ بھێنە ئاڤێتن دێ تورکیا بکەڤیتە قۆناغەکی نوو یا دیمۆکراتیک دا و رەنگە ئێدی پەیڤا شەری ژی ل تورکیا نەمینیت، ژ بەر کو ب راستی ژی پارتا کارکەرێن کوردستانێ خوە ب تەمامی بەرھەڤ کریە بۆ سازکرنا کۆنگرێ چەکدانینێ و ڤەکێشینا ژ تورکیا و باکورێ کوردستانێ، ڤێجا نھا ھەرکەس چاڤەرێی بجھکرنا ڤان سۆزایە کو حوکمەتا تورکیا دابوو بەرێز ئۆجەلانی و شاندێ پارتیا مە).
بالوکەن دیار ژی کر ژ بەر رەوشا خراب یا عەبدولا ئۆجەلان قەندیل و گەریلا نەرازینە و ب دژواری نێزیکبوونا حوکمەت و سەرۆک کۆمار ل ھەمبەر قۆناغا ئاشتیێ و ھەلویستێن ل دژی ئۆجەلانی شەرمازار دکەن و نە گەلێ کورد و نە ژی قەندیل سیاسەتا ل دژی برێز ئۆجەلان قەبوول ناکەن و وەک ھێلا سۆر ب ناڤ دکن و گۆت: (ئەم دێ بزاڤێن خوە بۆ سەرخستنا قۆناغا ئاشتیێ و چارەکرنا پرسگرێکا کوردی بەردەوام کەین، ھەر چەندە حوکمەت و سەرۆک کۆمار خوە ژ قۆناغا ئاشتیێ ڤەکێشاینە ژی، چونکو ئێدی چ کەس ناخوازیت خوین بھێتە رێتن و ئالۆزی دروست ببن، ئەز جارەکا دی گەلێن تورکیا دلنیا دکەم کو ئەم دێ ب ھەموو شیانێن خوە ڤە کار بۆ ئاشتی و دیمۆکراسیێ بکەین و فشارێ بێخنە سەر حوکمەتێ بۆ چارەکرنا پرسگرێکا کوردی و نەھێلانا دۆرپێچا ل سەر ئۆجەلانی).
بالوکەن د دووماھیا ئاخڤتنا خوە دا یداخواز ژ بەرپرسێن تورکیا کر کو دەست ژ کەمپینا رەشکرنا قۆناغا ئاشتیێ بەردەن و یاریان بۆ دەستپێکرنا شەری و ئالۆزکرنا رەوشا جڤاکێ ل تورکیا نەکەن و گۆت: (ئاشتی بۆ ھەموو وەلاتیێن تورکیا ژ ھەر تشتەکی پیرۆزترە و دڤێت حوکمەت و ئەردۆگان ژی ئاشتی و چارەکرنا پرسگرێکا کوردی نەکەنە قوربانیا چەند دەنگێن نەتەوەپەرستان و د زووترین دەم دا زمانێ خوە یێ توند ب گوھۆرینن).
