شاندەکێ دی یێ ھەرێمێ دێ سەرەدانا بەغدا کەت
ئەڤرۆ نیوز:
ئەندامەکێ جڤاتا نوونەرێن عیراقێ ژ فراکسیۆنا پارتی دیموکراتی کوردستان ڕاگەھاند، بڕیارە ل دەمەکێ نێزیک ئەو شاندێ دکۆمبوونا د ناڤبەرا پارتی و ئێکەتیێ دا بڕیار ل سەر ھاتیە دان، سەرەدانا بەغدا بکەت.
شاخەوان عەبدوللا ئەندامێ جڤاتا نوونەرێن عیراقێ ژ فراکسیۆنا پارتی دیموکراتی کوردستان و بڕیاردەرێ لژنا ئاسایش و بەرگریێ دوێ جڤاتێ دا، ل دووڤ مالپەرێ فەرمیێ پارتی، گۆت” ل دەمەکێ نێزیک شاندەکێ بلند یێ ھەرێما کوردستانێ کو پتریا لایەنێن سیاسی یێن کوردستانێ تێدا دپشکدارن، دێ سەرەدانا بەغدا کەت و ب شێوەکێ ڕاشکاوانە دێ ھەموو پرسان ل گەل بەغدا بەحس کەت، کو پێکھاتا شاندی ژی دێ دئاستێ نەتەوی و سیاسی دا بیت بۆ وێ چەندێ کۆمەکا پرسێن سیاسی و بابەتێن نەتەوی ل گەل بەغدا بھێنە بەحسکرن، بڕیارە ئەڤ شاندە ل گەل ھێزێن سیاسی یێن عیراقی کۆمبوونان بکەت”.
شاخەوانی گۆت ژی” مخابن عەقلیەتا بەغدا جۆرەک ژ نەگوھۆڕینێ یا پێڤە دیارە ل سەر مافێن دستووری و قانوونی و دبەردەوامن ل سەر پێشیلکرنا مافێن دستووری و قانوونی، لەوما یا گرنگە کورد دووماھی پەیاما خوە بگەھیننە حوکمەتا عیراقێ و ھێز و لایەنێن سیاسی یێن عیراقی”.
ڤی پەرلەمانتارێ فراکسیۆنا پارتی خویاکر ژی” ڕەوشا عیراقێ یا ئالۆز بووی و کوردان ژی نەڤێت ببنە لایەنەک دکێشان دا، چونکی ئاگرەکێ ب ھێز یێ دناڤمالا شیعی دا ھەیو سونە ژی یێن بووینە چەندین بەرە و ناھێتە زانین چاوان ڕەفتار دگەلدا بھێتە کرن”.
