شاندەکێ ھەرێما کوردستانێ دێ چیتە بەغدا
ئەڤرۆ نيوز:
نوونەرێ حوکمەتا ھەرێما کوردستانێ ل بەغدا دیار دکەت کو ب مەرەما چارەسەرکرنا گرفتێن د ناڤبەرا ھەولێر و بەغدا دا، شاندەکێ ھەرێما کوردستانێ دێ چیتە بەغدا.
فارس عیسا، نوونەرێ حوکمەتا ھەرێما کوردستانێ ل بەغدا ئاشکرا کر کو سیاسەتا مەسرۆر بارزانی، سەرۆک وەزیرێن ھەرێما کوردستانێ ئەوە کو ئاریشێن تایبەت ب ماددێ 140 و گرفتێن پشتی 16 ئۆکتۆبەرێ و بابەتێ پەترۆل و گازێ بھێنە چارەکرن.
ناڤھاتی بۆ باسنیوز گۆت: “گیرۆبوونا چارە نەکرنا گرفتێن د ناڤبەرا ھەولێر و بەغدا دا، د بەرژەوەندیا ھەردو لایەنان دا نینە، د نوکە ژی دا رەوش ھاتیە گوھارتن و پەیوەندیێن بەردەوام د ناڤبەرا ھەولێر و بەغدا دا ھەنە”.
نوونەرێ حوکمەتا ھەرێمێ ل بەغدا ئاشکرا ژی کر، ب مەرەما چارەسەرکرنا گرفتان، لیژنەکا ھونەری ھاتیە دروستکرن، داکو ب تمامی ئەو گرفتێن ھەین ل گەل بەغدا بھێنە چارەسەرکرن و گۆت: “بڕیارە د ڤان رۆژان دا شاندەکێ ھەرێما کوردستانێ بۆ ڤان پرسێن گرنگ سەرەدانا بەغدا بکەت”.
بەری نوکە ژی د ناڤبەرا ھەردو حوکمەتێن ھەرێما کوردستانێ و حوکمەتا عیراقا فیدرال دا چەندین کۆمبوون ھاتینە ئەنجامدان گۆت: “د ڤێ دووماھیێ دا مەسرور بارزانی، سەرۆکێ حوکمەتا ھەرێما کوردستانێ سەرەدانا بەغدا کربوو و شاندەکێ عیراقێ ژی ھاتبوو ھەولێر”.
