شاندەکێ ھەرێمێ بۆ مووچێ شەھیدان دێ سەرەدانا بەغدا کەت
ئه‌ڤرۆ نيوز:
بڕیارە شاندەکێ بلندێ حوکمەتا ھەرێما کوردستانێ سەرەدانا بەغدا بکەت و پەیڤدارێ وەزارەتا کاروبارێن شەھید و ئەنفالکریان ژی دبێژیت، مەرەما چوونا شاندێ ھەرێما کوردستانێ بۆ راستڤەکرنا مووچێ شەھیدو ئەنفالکریانە ل گەل یێ بەغدا.
فوئاد عوسمان، پەیڤدارێ وەزارەتا کاروبارێن شەھید و ئەنفالکریان بۆ رۆژناما ئەڤرۆ گۆت: ”بەری نوکە ژ لایێ سەرۆکایەتیا جڤاتا وەزیرێن ھەرێما کوردستانێ لیژنەیەک ب سەرۆکایەتیا مەحمود حاجی سالح وەزیرێ کاروبارێن شەھید و ئەنفالکریان ھاتیە پێکئینان ب مەرەما بجھئینانا بڕیارا پەرلەمانێ عیراقێ ژ بووی ھەڤبەریکرن و ڤەگوھاستنا مووچێ کەس و کارێن شەھیدان و ئەنفالکریان ل گەل یێن بەغدا، لەوڕا ژی بڕیارە ل رۆژێن داھاتی شاندەکێ حوکمەتا ھەرێما کوردستانێ سەرەدانا بەغدا بکەت و ل گەل ھەردو دەزگەھێن شەھید و زیندانیێن سیاسیێن بەغدا ھەماھەنگیێ چێکەت، ھەتا مووچێ شەھیدێن ھەرێما کوردستانێ بھێتە ڤەگوھاستن بۆ سەر ئەڤان دەزگەھێن عیراقێ و وەکھەڤکرنا مووچێ ھەرێمێ ل گەل بەغدا.
فوئاد عوسمان گۆتژی” ھێشتا ژڤانێ چوونا شاندێ ھەرێما کوردستانێ بۆ بەغدا یێ دیار نینە، بەلێ رۆژێن داھاتی دێ سەرەدانێ ئەنجام دەن، ژ بەر کو ژ لایێ قانوونی ڤە دڤێت رێنمایێ دارایی بھێنە ئێکگرتن جوداھی د ناڤبەرا قانوونێن ھەرێما کوردستانێ و بەغدا ھەیە د زۆر بیاڤان دا، نوونەرێ سەرۆکایەتیا جڤاتا وەیزان ژی دێ ل گەل شاندێ ھەرێمێ بیت و لیستا مووچەی دێ بەنە بەغدا.
