شرۆڤه‌كاره‌كێ سیاسی: باشتره پێنج سالان جاره‌كێ هه‌لبژارتن بهێنه ئه‌نجامدان
هه‌ولێر، قائید میرۆ
كێمتری دو هه‌یڤان بۆ برێڤه‌چوونا هه‌لبژارتنێن هه‌رێما كوردستانێ ماینه و هێشتا ئالیێن سیاسی نه‌گه‌هشتینه رێككه‌فتنێ ل دۆر شێوازێ ئه‌نجامدانا وان، شرۆڤه‌كاره‌كێ سیاسی ژی دبێژیت، ده‌لیڤه بۆ ئه‌نجامدانا هه‌لبژارتنان نه‌مایه و دێ په‌رله‌مانێ كوردستانێ ژیێ خوه درێژكه‌ت هه‌روه‌سا دبێژیت، پێشنیاز دكه‌م سیسته‌مێ برێڤه‌چوونا هه‌لبژارتنێن كوردستانێ بهێته گوهۆڕین و هه‌ر پێنج سالان جاره‌كێ هه‌لبژارتن بهێنه ئه‌نجامدان.
دلشاد نامق، شرۆڤه‌كارێ سیاسی بۆ رۆژناما (ئه‌ڤرۆ) گوت” چه‌ندین جاره خولا په‌رله‌مانێ دهێته درێژكرن ئه‌ڤه‌ژی بۆ رێككنه‌كه‌فتنا ئالیێن سیاسی ل دۆر ئه‌نجامدانا پرۆسا هه‌لبژارتنان دده‌مێ خوه‌دا ڤه‌دگه‌ڕیت، هه‌تا ل خولا بۆری یا په‌رله‌مانێ كوردستانێ ژی بۆ ده‌مێ ساله‌كێ ژیێ په‌رله‌مانی هاته درێژكرن، ئه‌ڤه تشته‌كێ ڤه‌شارتی نینه و نه‌بوونا دستووری ئه‌گه‌ره‌كێ سه‌ره‌كیه كو په‌رله‌مان بشێت ژیێ خوه درێژ بكه‌ت، ئه‌ڤه‌ژی و ئه‌ڤه‌ژی نیشانا وێ چه‌ندێ یه كو سیسته‌مێ سیاسی ل هه‌رێما كوردستانێ سیسته‌مه‌كێ جهگیر نینه ژ به‌ر نه‌بوونا دستووری”.
گوت ژی”وه‌كو نه‌یته‌ك هه‌موو جاره‌كێ ده‌مێ ئالیێن سیاسی نه‌گه‌هن رێكه‌فتنێ نه‌چار دبن ژیێ په‌رله‌مانی درێژ دكه‌ن، ده‌مێ په‌رله‌مانی ژیێ خوه درێژكر ئانكو ژیێ حوكمه‌تێ و سه‌رۆكایه‌تیا هه‌رێما كوردستانێ ژی دهێته درێژكرن، پرۆسا سیاسی پێكهاتیه ژ ئالیێن سیاسی ئه‌ڤه‌ژی هۆكاره ئالیێن ناڤا په‌رله‌مانی ده‌مێ هه‌لبژارتن گیرودبن ژیێ په‌رله‌مانی درێژ بكه‌ن”.
خویاكر” بڕیاربوو ل ده‌ستپێكا هه‌یڤا ئۆكتۆبه‌را داهاتی هه‌لبژارتنێن په‌رله‌مانێ كوردستانێ بهێنه ئه‌نجامدان، به‌لێ ده‌م نه‌مایه بۆ ڤێ پرۆسێ د ژڤانێ بۆ هاتیه دیاركرن دا هه‌لبژارتن بهێنه ئه‌نجامدان و ژئالیێ ته‌كنیكی ڤه چو به‌رهه‌ڤی نه‌هاتینه‌كرن، كۆمسیۆن ژی نه‌هاتیه كاراكرن و رێككه‌فتن ژی نه‌هاتیه‌كرن و ره‌وشا ئیراقێ ژی یا ئالۆزه وئه‌ڤه هه‌موو بووینه ئه‌گه‌رێ پاشخستنا هه‌لبژارتنان، ڤێجارێ ژی وه‌كو دیار دێ په‌رله‌مانێ كوردستانێ ژیێ خوه درێژكه‌ت و ب ده‌نگێ پتریا په‌رله‌مانی دێ ژیێ په‌رله‌مانی هێته درێژكرن”
دلشاد نامق رۆهنكر” هه‌كه په‌رله‌مان ژیێ خوه درێژ نه‌كه‌ت بێگومان هه‌رێما كوردستانێ دێ كه‌ڤیته دڤالاهیه‌كا قانوونی و دستووریدا، حوكمه‌تێ ژی ده‌ستهه‌لات نامینن و دێ بیته حوكمه‌تا كار برێكه‌ر، پێدڤیه ئه‌ڤه بهێته چاره‌سه‌ركرن، له‌وڕا ژی ئه‌ز پێشبینیێ دكه‌م قانوونه‌ك بهێته ده‌ركرن و ب قانوون چاره‌سه‌ریا ڤالاهیا دستووری بهێته‌كرن، به‌لێ دیار نینه دێ ده‌مێ درێژكرنێ بۆ چه‌ندێ بیت، هه‌رچه‌نده گاڤه‌كا باش نینه بۆ ئه‌زموونا هه‌رێما كوردستانێ هه‌موو جاره‌كێ ژیێ په‌رله‌مانی بهێته درێژكرن، هه‌روه‌سا من جاره‌كێ پێشنیازكریه ده‌مێ برێڤه‌چوونا هه‌لبژارتنان ببیته پێنج سال نه‌كو چار سالبن، ل وه‌لاته‌كێ وه‌كو فه‌ره‌نسا هه‌لبژارتنا سه‌رۆكی شه‌ش سالان جاره‌كێ بڕێڤه‌دچیت و ب دیتنا من ئاساییه هه‌كه ل هه‌رێما كوردستانێ پێنج سالان جاره‌كێ هه‌لبژارتن بهێنه ئه‌نجامدان و بلا چار سال نه‌بن، چونكه ساله‌ك دڤێت هه‌تا ئالیێن سیاسی دگه‌هنه رێككه‌فتنێ، ئانكو ساله‌ك تنێ بۆ دانوستاندنێن ئالیێن سیاسی بیت و ئه‌ڤ بابه‌ته دێ هێته چاره‌سه‌ركرن”.
