شرۆڤه‌كاره‌كێ سیاسی: خه‌لكێ كوردستانێ داخوازا ئێك گۆتاریێ به‌رامبه‌ر به‌غدا دكه‌ت
ئه‌ڤرۆ، عه‌زیز هه‌ورامی
پارتی دیموكراتی كوردستان ل هه‌لبژارتنێن ڤێ دووماهیێ یێن جڤاتا نوونه‌رێن ئیراقێ رێزا ئێكێ ل هه‌رێما كوردستانێ و ئیراقێ بده‌ستڤه‌ئینا و بوو خودانا 33 كورسیان، د نوكه دا ژی بۆ ئێك گوتاریا كوردان و پرسا پشكا كوردان د حوكمه‌تا نوو یا ئیراقێ دا دانوستاندن ل گه‌ل لایه‌نێن سیاسی یێن كوردستانی ده‌ست پێ كرینه.
د. سامان شالی، شرۆڤه‌كارێ سیاسی بۆ رۆژناما (ئه‌ڤرۆ) گۆت” كۆمبوونێن پارتی ل گه‌ل لایه‌نێن سیاسی گرنگیا خوه یا هه‌ی بۆ ئێكرێزیێ و بده‌ستڤه‌ئینانا مافێن مه یێن دستووری ل به‌غدا، خه‌لكێ كوردستانێ پێ خوه‌شه د ئێك ده‌نگ و ئێك هه‌لویست بین ل به‌غدا ژبه‌ركو ب ئێك ده‌نگیێ دێ شێین داخوازا مافێن خوه كه‌ین كو هه‌تا نوكه حوكمه‌تێن ئێك ل دووڤ ئێك یێن به‌غدا په‌شێمان بووینه ژ دانا مافێن دستووری یێن خه‌لكێ كوردستانێ”.
دیاركر” گرنگه حزبێن كوردستانێ ل دووڤ داخوازیا پارتی بچن تاكو هه‌موو پێكڤه ب ئێك تیم بچنه به‌غدا و جاره‌كا دی ناڤمالا كوردی په‌رت و به‌لاڤ نه‌بیت، چونكه به‌رده‌وام دژمنێن كوردان مفا ژ په‌رت و به‌لاڤبوونا ناڤمالا كوردی دیتیه و بزاڤێ ژی دكه‌ن نه‌هێته رێكخستن”.
هه‌روه‌سا گۆت” ئه‌وا سه‌رنجا من راكێشای شاندێن پارتی سه‌ره‌دانا وان حزبان ژی كریه ئه‌وێن د هه‌لبژارتنان دا چ كورسی بده‌ستڤه‌نه‌ئیناین و ئه‌ڤه وێ چه‌ندێ دیاردكه‌ت كو پارتی بزاڤێن رژد دكه‌ت بۆ رێكخستنا ناڤمالا كوردی تاكو هه‌موو ده‌نگ بهێنه رێكخستن ئه‌وژی كاره‌كێ راست و دروسته كو پارتی دكه‌ت، ئه‌م ب هیڤی نه ژی كو ستراتیژیه‌كێ نه‌ته‌وی بهێته دانان كو كه‌س نه‌شێت ژێ لابده‌ت و هه‌موو پێگیر بن پێ وی ده‌می دێ سه‌نگا زێده‌تر ب سه‌رۆكایه‌تیا هه‌رێمێ ژی ده‌ت د په‌یوه‌ندیێن دبلۆماسی دا”.
ئاماژه‌كر” رێژه‌كا مه‌زن ژ خه‌لكێ كوردستانێ بایكۆتا هه‌لبژارتنان كر، پێدڤیه بزاڤ بهێنه كرن بهێته زانین بۆچی ده‌نگێ خوه نه‌دایه، پێدڤیه حزبێن كوردستانێ ڤه‌خواندنه‌كێ بۆ ڤێ چه‌ندێ بكه‌ن و گوهێ خوه بده‌نه نه‌رازیبوونێن خه‌لكی”.
دیاركر” پێنج كورسیێن كوردان ل جڤاتا نوونه‌رێن ئیراقێ زێده‌بوون كو بووینه 63 كورسی، پێدڤیه لایه‌نێ كوردی ل گه‌ل لایه‌نێ ئیراقی دانوستاندنان بكه‌ت و ئیراق یاریان ب مافێن خه‌لكێ كوردستانێ نه‌كه‌ت، هه‌كه كوردان پێكڤه ستراتیژیه‌ك هه‌بیت باوه‌رناكه‌م هیچ لایه‌نه‌كێ ئیراقی بشێت یاریان ب مافێن كوردان بكه‌ت”.
رۆهنكر ژی” پارتی به‌رنامێ خوه یێ تایبه‌ت هه‌بوو د هه‌وا هه‌لبژارتنان دا و پارتی د ناڤخوه دا یا ئێكگرتی بوو و یا رژده ل سه‌ر پاراستنا مافێن خه‌لكێ كوردستانێ و به‌رنامێ پارتی ل ده‌ف خه‌لكێ كوردستانێ یێ په‌سه‌ندكری بوو، ل به‌غدا ژی په‌رله‌مانتارێن پارتی دێ پێگیری بابه‌تێن نه‌ته‌وی بن ئه‌ڤێ چه‌ندێ ژی وه‌كریه خه‌لك باوه‌ریێ بده‌نه پارتی به‌رۆڤاژی وان حزب و كه‌سێن دژی مافێن وه‌لاتیێن كوردستانێ بوون و ب ده‌نگێن كوردان چبوونه به‌غدا”.
