شرۆڤەکارەک: کازمی دەنگێن پەرلەمانی مسۆگەر کرینە
ئەڤرۆ نیۆز، قائید میرۆ:
پشتی بەربژێرکرناوی بۆ پۆستێ سەرۆک وەزیرێن عێراقێ زۆربەیا ھێزێن سیاسی یێن عێراقێ پشتەڤانیا خوە بۆ مستەفا کازمی نیشادایە و شرۆڤەکارەکێ سیاسی ژی دبێژیت، کازمی سەرۆک وەزیرێ عێراقێ یێ پشتی عادل عەبدولمەھدیە.
موئەیەت تەیب، شرۆڤەکارێ سیاسی بۆ ئەڤرۆ نیۆز دیارکر” پشتی دەست ژکارکێشانا عادل عەبدولمەمدی پێدڤی بو کەسەکێ دی بھێتە راسپاردن بۆ سەرۆک وەزیرێن عێراقێ، بەلێ ھەردو بەربژێرێن بەرێ ھەم محەمەد عەلاوی و ھەم عەدنان زورفی پشتەڤانی نەبو ببینە سەرۆک وەزیرێن عێراقێ، چونکە دناڤا پەرلەمانی دەنگ بدەستڤە نە دئینان، بەلێ بدیتنامن مستەفا کازمی دێ شانس ھەبیت دەنگێ پەرلەمانی بدەستڤە بینیت، چونکە زۆربەیا لایەنێن سیاسی پشتەڤانیا کازمی دکەن.
ئەڤی شرۆڤەکارێ سیاسی گۆت” ھەردەمێ کازمی کابینا خوە پێشکەشی پەرلەمانێ عێراقێ بکەت، ئەڤە ب پشتڕاستی ڤە دێ ھێتە پەسەندکرن، زۆربەیا کۆتلەیێن ناڤا پەرلەمانی پشتەڤانیا کازمی دکەن بۆ پێک ئینانا کابینا حوکمەتێ، ھەموو ئاماژە بۆ ھندێ نە مستەفا کازمی سەرۆک وەزیرێ عێراقێ یە پشتی عادل عەبدولمەھدی.
موئەیەت تەیب ئاشکراکر”پێک ئینانا حوکمەتەکا نوو ل عێراقێ بۆ ڤێ قۆناغێ یا گرنگە، ژبەرگو عێراق یا د کومەکا قەیرانان دەرباز دبیت، ژوانا پڕۆژە قانوونا بودجەی نەھاتیە پەسەندکرن، چەندین ئاریشە ھەنە پێدڤیە بھێنە چارەسەرکرن.
