شه‌ریف سلێمان:ڕه‌وشا ئه‌منی یا شنگالێ ڕێگره ل زڤرینا ئاواره‌یان
ئه‌ڤرۆ:
ئاواره‌یێن شنگالێ یێن دناڤ كه‌مپان دا ل هه‌رێما كوردستانێ د ئاكنجی، دخوازن بزڤرن جهێن خوه، ڕه‌وشا ده‌ڤه‌رێن وان بهێته ئارامكرن و حوكمه‌تا ئیراقێ وان قه‌ره‌بوو بكه‌ت.
ب گۆره‌ی كارنامه‌یا حوكمه‌تا نوو یا ئیراقێ ب سه‌رۆكایه‌تیا محه‌مه‌د شیاع سودانی، سه‌رۆك وه‌زیرێن ئیراقێ، پێدڤیه د ده‌مێ شه‌ش هه‌یڤان دا ڕێككه‌فتنا شنگالێ، كو د ناڤبه‌را حوكمه‌تا ئیراقێ و هه‌رێما كوردستانێ دا هاته ئیمزاكرن، بهێته بجهئینان و ڕه‌وشا شنگالێ بهێته ئاساییكرن و هه‌موو ئاواره بۆ ده‌ڤه‌رێن خوه بزڤرن.
شه‌ریف سلێمان، ئه‌ندامێ جڤاتا نوونه‌رێن ئیراقێ ژ فراكسیۆنا پارتی و سه‌رۆكێ لژنه‌یا كۆچ و كۆچبه‌ران ل جڤاتا نوونه‌ران گوت” ب گۆره‌ی كارنامه‌یا حوكمه‌تا محه‌مه‌د شیاع سودانی، پێدڤیه حوكمه‌ت هه‌موو كه‌مپێن ئاواره‌یان ل ئیراقێ و هه‌رێما كوردستانێ نه‌هێلیت و هه‌موو ئاواره بزڤرن ده‌ڤه‌رێن خوه، د وی چارچۆڤه‌ی دا پێدڤیه ڕێككه‌فتنا شنگالێ بهێته بجهئینان و ئاواره‌یێن وی باژێرێ بزڤرین جهێن خوه”.
سالم شنگالی، ئاواره‌یێ كه‌مپا شاریا دبێژیت” قوتابخانه، نه‌خوه‌شخانه و هه‌موو ده‌زگه‌هێن شنگالێ د بێ خزمه‌تگوزارینه و كاره‌با ژی نینه، ژێرخانه‌یا شنگالێ ب تمامی یا وێرانبووی و نوكه ئه‌و باژێره نه‌هاتیه به‌رهه‌ڤكرن پێشوازیێ ل ڤێ هه‌ژمارا مه‌زن یا ئاواره‌یان بكه‌ت”.
یه‌لا خودێدا، ئافره‌ته‌كا ئاواره یا شنگالێ ل كه‌مپا شاریا دبێژیت” هه‌كه ڕه‌وشا ئه‌منی ل شنگالێ نه‌هێته ئاساییكرن و حوكمه‌تا ئیراقێ قه‌ره‌بوویا مه نه‌كه‌ت، د به‌رهه‌ڤ نینن بزڤرین”.
ب گۆره‌ی وان ئامارێن هاتینه به‌لاڤكرن، زێده‌تر ژ هه‌شت ملیار دۆلاران بۆ دوباره ئاڤه‌دانكرنا شنگالێ و قه‌ره‌بووكرنا خه‌لكێ وێ د پێدڤی نه، چونكه 80% ژ ژێرخانه‌یا ئابووری یا شنگالێ ژ ئالیێ داعشێ ڤه هاتیه وێرانكرن.
