شه‌ریف سلێمان: خرابیا ره‌وشا سیاسی یا ئێراقێ كارتیكرنه‌كا نه‌رێنی ل ئاواران دكه‌ت
دهۆك، له‌زگین جوقی
سه‌رۆكێ لژنا كۆچ وكۆچبه‌ران ل جڤاتا نوونه‌رێن ئیراقێ باسێ كارتێكرنا خرابیا ره‌وشا ئیراقێ ل سه‌ر دوسێیا ئاواران دكه‌ت و دبێژیت، حوكمه‌تا ئیراقێ چو به‌رنامه بۆ ئاواران نینن و شه‌رمزاریه‌كا مه‌زنه بۆ دیرۆكا ده‌وله‌تا ئیراقێ كو وه‌لاتیێن وێ د ناڤدا ئاواره بن ونه‌شێن ڤه‌گه‌رنه سه‌ر مال وجهێن خوه.
شه‌ریف سلێمان، سه‌رۆكێ لژنا كۆچ وكۆچبه‌ران ل جڤاتا نوونه‌رێن ئیراقێ گوت” خرابیا ره‌وشا سیاسی یا نوكه ل ئیراقێ كارتێكرنه‌كا گه‌له‌ك خراب ل سه‌ر ئاواران كریه و شه‌رمزاریه‌كا مه‌زن بۆ ده‌وله‌تا ئیراقێ وه‌سا وه‌لاتیێن وێ دناڤدا ئاواره بن ونه‌شێن ڤه‌گه‌رنه سه‌ر مال و جهێن خوه كو ره‌وشا ئاواران به‌ر ب خرابی ڤه‌یه و چو ئالیه‌ته‌ك بۆ چاره‌سه‌ركرنا ره‌وشا ئاواران د ده‌ستێ حوكمه‌تا ئیراقێ دا نینه”.
گوت ژی” مه وه‌كو لژنا كۆچ و كۆچبه‌ران ل جڤاتا نوونه‌رێن ئیراقێ به‌رنامه‌كێ باش دایه حوكمه‌تا ئیراقێ بۆ چاره‌سه‌ركرنا ره‌وشا ئاواران لێ چو كار ل سه‌ر نه‌هاتیه كرن نوكه ئه‌م چاڤه‌رێی حوكمه‌تا نوو دكه‌ین كو ده‌مێ حوكمه‌ت دهێته پێكئێنان پێدڤیه ئێك ژ خالێن رێككه‌فتنین دناڤبه‌را ئالیێن سیاسی دا ل ئیراقێ چاره‌سه‌ركرنا دوسێیا ئاواران بیت “.
شه‌ریف سلێمان دیاركر ژی كه به‌غدا ئاگه‌ه ژ ئێش وئازارێن ئاوارێن شنگال نینه كو به‌ری چه‌ند رۆژان ژی ل كه‌مپا (باجد كه‌ندالا) ل قه‌زا سێمێلێ 22 چادرێن ئاواران هاتنه سۆتن ئه‌ڤه بۆ به‌غدا خه‌م ژی نه‌بوویه هه‌تا گه‌نگی دێ ئاواره دڤێ ره‌وشا په‌ریشاندا بن و پێدڤیه هنده‌ك رێككه‌فتن بۆ چاره‌سه‌ركرنا ره‌وشا ئاواران بهێنه ئه‌نجامدان ژوان ئه‌و رێككه‌فتنا دناڤبه‌را حوكمه‌تا هه‌رێما كوردستانێ و ئیراقێ دا بۆ ئاساییكرنا ره‌وشا شنگالێ بجه بهێت ژ به‌ر كو هه‌موو ئاواره خه‌لكێ ئیراقێ نه وپتریا وان ئاكنجیێن شنگالێ نه و ئه‌ڤه هه‌شت سالن خه‌لك ئاواره بووی وهێشتا چو به‌رنامه بۆ زڤرینا ئاواران نینن و هه‌تا نوكه ژی به‌غدا نه‌شیایه ته‌ناهیێ ل شنگالێ دابین بكه‌ت تاكو ئاواره بشێن ڤه‌گه‌رن”.
پتر رۆهنكر” لژنا كۆچ وكۆچبه‌ران ل جڤاتا نوونه‌رێن ئیراقێ به‌رنامه‌یه‌كێ باش یێ هه‌ی بۆ گه‌هاندنا پرۆژه‌یێن خزمه‌تگوزارێ بۆ ناڤ كه‌مپێن ئاواران وخه‌لكێ زیاندار بهێته قه‌ره‌بووكرن دگه‌ل ڤێ چه‌ندی مه به‌رنامه‌یه‌ك دانایه بۆ زڤرینا ئاواران ژ كه‌مپان بۆ ده‌ڤه‌رێن خوه لێ خرابیا ره‌وشا ئیراقێ بوویه ئه‌گه‌ر گه‌له‌ك كارتێكرن ل دوسێیا ئاواران ببیت ب تایبه‌تی ژی ژ ئالیێ ته‌ناهیێ كو هه‌تا ته‌ناهی ل ده‌ڤه‌را شنگالێ په‌یدا نه‌بیت ئاواره نه‌شێن ڤه‌گه‌رن ومه به‌رنامه‌یه‌ك دایه وه‌زاره‌تا كۆچ وكۆچبه‌ران ل ئیراقێ كو ل سه‌ر كار بكه‌ن بۆ باشتركرنا ره‌وشا ئاواران “.
زێده‌تر گۆت” ئاریشه‌یه رێكخراو خوه ژ كه‌مپان ڤه‌كێشن ژبه‌ركو هێشتا ئاواره یێن د كه‌مپان دا ماین ونه‌زڤرینه ده‌ڤه‌رێن خوه یێن ره‌سه‌ن و ئه‌ڤه دێ گه‌له‌ك كارتێكرنێ ل ئاواران كه‌ت ومه داخواز ژ حوكمه‌تا ئیراقێ كریه جهێ رێكخراوان بهێته پڕكرن و حوكمه‌تا ئیراقێ دشێت دده‌مێ دو هه‌یڤاندا دوسێیا ئاواران چاره‌سه‌ر بكه‌ت، لێ یا دیاره هێشتا به‌غدا دوسێیا ئاواران ب گرنگی وه‌رنه‌گرتیه”.
