شه‌هرام عه‌لیدی بوو ئه‌ندامێ لژنەیا دادوه‌ری ل گه‌ڕا ئێكێ یا فێستیڤالا فلمێن ئاسیایی ل دوبه‌ی
زنار تۆڤی:
ده‌رهێنه‌ر و سیناریستێ كورد شه‌هرام عه‌لیدی، وه‌كو ئه‌ندامێ لژنا دادوه‌ری ل گه‌را ئێكێ یا فیستیڤالا فلمێن ئاسیایی ل دوبه‌یی (AFFD) بۆ سالا 2027 هاته دیاركرن، بریاره ئه‌و فیستیڤاله ل 1 هه‌تا 7 ی شواتا 2027 ل باژێرێ دوبه‌یی بهێته گێران و ژ لایێ مۆڤییه دۆم ڤه دێ هێته رێكخستن، هه‌روه‌سا ئه‌ڤ فیستیڤاله دێ بیته هه‌لكه‌فته‌كا نوو یا سینه‌مایی ل كه‌نداڤی، حه‌فت رۆژان دێ ئاهه‌نگێ بۆ سینه‌مایا ئاسیایی، هندی و ئیماراتی گێریت، ئارمانجا فیستیڤالێ ئه‌وه كو ل سه‌ر ئێك میمبه‌ر سینه‌مایا سه‌ربه‌خۆ، دروستكه‌رێن ناڤه‌رۆكا دیجیتالی، به‌هره‌یێن پلاتفۆرمێن په‌خشی و سینه‌مایێ پێكڤه كۆم بكه‌ت.
هه‌روه‌سا مۆڤییه دۆم دێ ڤێ فیستیڤالێ وه‌كو پشكه‌ك ژ پلانا به‌فره‌هبوونێ ل وه‌لاتێن كه‌نداڤی دامه‌زرینیت، داكو ژینگه‌هه‌كێ سینه‌مایی یا جڤاكی ل ئیماراتێ دروست بكه‌ت كو به‌هره‌یێن نوو و ناڤێن دیار یێن سه‌رانسه‌ری ئاسیا بخۆڤه بگریت.
شه‌هرام عه‌لیدی، دیاركر: ئه‌و دێ ل گه‌ل لژنه‌كا دادوه‌ری یا ئاست بلند كو ژ چه‌ندین فلمساز و ئه‌كته‌رێن خودان خه‌لاتێن نێڤده‌وله‌تی بیت، ژ وان ژی، ئه‌نیرودا رۆی چاودری، ئه‌نوپارنا رۆی، شیلادیتیا بۆرا، تانیشتا چاته‌رجی، ره‌یحان رافی ژ به‌نگلادێشێ، لینا یاداڤ، نیخیل ئه‌دڤانی، پراسانا ڤیتاناگی (ژ سریلانكا)، شاریب هاشمی و بیجۆی نامبیار، ئه‌ڤ لژنه به‌ری ده‌ستپێكرنا فیستیڤالێ، فلمان د هه‌لسه‌نگینن و بریارێ ل سه‌ر باشترین فلم دده‌ن.
ناڤهاتی گۆت ژی: هه‌بوونا ده‌رهێنه‌ره‌كێ كورد دناڤ لژنا دادوه‌ری یا ڤێ فیستیڤالا نوو دا، گرنگیه‌كا تایبه‌ت هه‌یه، ژ به‌ركو پێگه‌هه‌كێ دده‌ته سینه‌ما كوردی د ناڤ سینه‌مایێن مه‌زن یێن ئاسیایی دا، دیسا ده‌لیڤه‌كا باشه بۆ فلمسازێن سه‌ربه‌خۆ یێن هه‌رێما كوردستانێ و عێراقێ بۆ چێكرنا په‌یوه‌ندییان ل گه‌ل بینه‌ر، پلاتفۆرم و كۆمپانیێن به‌رهه‌مهێنانێ ل كه‌نداڤی و ئاسیا.
شه‌هرام عه‌لیدی، ده‌رهێنه‌ر، سیناریست و شێوه‌كاره، ل باژێرێ سنه ل رۆژهه‌لاتێ كوردستانێ ژ دایك بوویه و كۆلیژا هونه‌رێن جوان ل زانكۆیا ته‌هران خواندییه، نوكه ل پاریس ل وه‌لاتێ فره‌نسا دژیت و هه‌روه‌سا رێڤه‌به‌رێ هونه‌ری یێ فیستیڤالا نێڤده‌وله‌تی یا فلمانه ل سلێمانیێ، ناڤهاتی چه‌ندین خه‌لاتێن نێڤده‌وله‌تی بۆ كورته فلمێن خۆ (ماملێ، شێركۆ بیكه‌س و دووماهی گوندێ نه هژمارتی) وه‌رگرتینه، هه‌روسا فلمێ وی یێ درێژ یێ ب ناڤێ (سرته له‌گه‌ل با) كو به‌حسێ كاره‌ساتا ئه‌نفالێ دكه‌ت، ل فیستیڤالا كان هاتییه نیشا دان.
فلمه‌كێ دی ژی ب ناڤێ ( بیره‌وه‌ریێن هه‌سپێ ره‌ش) كو ل باكورێ كوردستانێ هاتییه وێنه‌كرن، رۆناهییێ دئێخیته سه‌ر قه‌ده‌غه‌كرنا خواندنێ ب زمانێ كوردی ل باكورێ كوردستانێ.
