شه‌پولەکا دی یا گه‌شتیاران بەر ب هه‌رێما كوردستانێ ڤە هاتن
ئەڤرۆ نیوز ، نەوزاد هلۆری:
دەستەیا گەشت و گۆزار یا سەر ب حکومەتا هەرێما کوردستانێ هاتنا شەپولەکا دن یا گەشتیاران بەر ب هەرێما کوردستانێ راگەهاند کو دێ ل ڤان نێزیکان گەهنە هاڤینگەه و جهێن گەشت و گوزار و بازارێن هەرێما کوردستانێ.
دەستەیا گەشت و گۆزارێ زێدەتر دیارکر کو هاتنا گەشتیاران بو هەرێما کوردستانێ پشتی جەژنا رەمەزانا پیرۆز شێوەکێ بەردەوام دەست پێ کریە و بەردەوامە و ئەڤ یەک ژی لڤاندنەکا زۆر د جهێن گەشت و گۆزاری و بازارێن هەرێما کوردستانێ درۆستکریە.
ل گۆرەی داتایێن وەزارەتا باژێرڤان و گەشت و گوزار هاتنا گەشتیاران بەرامبەر سالێن بوری ب رەنگەک بەرچاڤ بەر ب زێدەبوونێ ڤە چویە و تنێ ل روژێن جەژنێ 120 هزار گەشتیاران سەرا هەرێما کوردستانێ کریە ، پرانیا وان ژی ئاکنجیێن ناڤەراست و باشوورێ عراقێ بوینە.
دروستکرن و نوژەنکرنا جهێن گەشت و گۆزاری ل هەرێما کوردستانێ پشتی هاتنا ئاوارە و شەرێ داعش زێدەتر بویە ، دیسان هەبوونا شەر و ئالوزیان ژی ل هەند باژێرێن عیراقێ بویە سەدەم کو گەشتیار زێدەتر بهێنە هەرێما کوردستانێ.
