شیانێن سه‌ربازی یێن ئیران و سعوودیێ دهێنە ئاشكرا کرن
ئەڤرۆ نیۆز ، زنار تۆڤی:
ل رۆژانێن بوری، په‌یوه‌ندیێن دبلۆماسی یێن دناڤبەرا سعوودیه و ئیرانێ گرژیێن زۆر ب خۆڤە دیتن، ب تایبه‌تی پشتی کو به‌رگرییا ئەسمانی یا سعوودیه، روو ب روو مووشه‌كەکێ بووی،کو ژ یه‌مه‌نێ هاتە ئاراستەکرن بۆ ریاز و میدیایێن وی وەلاتی وه‌ك كریارەکا دوژمنكارانه یا ئیرانی ل دژی سعوودیه ب ناڤکر.
گرژی زێدەبوون و رۆژناما ده‌یلی ئێكسپرێس یا بریتانی به‌راوردیەك دناڤبەرا شیانێن سه‌ربازی یێن سعوودیه و ئیرانێ دا كرینە.
لدووڤ وێ راپۆرتا رۆژناما بریتانی،سعوودیه دشێت نێزیكی 934 هزار كه‌سا بۆ خزمه‌تكرنا نیشتمانی بانگهێشت بكەت،د دەمەکێ دا نێزیکی 4 ملیۆن کەسان ئاماده بکەت ل دەمێ پێدڤیدا، به‌لێ ئیرانێ 250 هزار سه‌رباز و ئه‌فسه‌ر د رێزا سوپای دا هەنە و دشێت 14 ملیۆن كه‌سان بۆ خزمه‌تا نیشتمانی بانگهێشت بكەت.
هەروەسا دیارکریە کو هێزا ئەسمانی یا سعوودی خودانا 790 فرۆكێن شه‌ركه‌ر و هێلیكۆپته‌ره و پتریا وان شه‌ركه‌رن، به‌لێ هێزا ئەسمانیا ئیرانێ خودانا 476 فرۆكانە و زۆربه‌یا وان فرۆکێن ڤەگۆهاستنێ نە.
به‌لێ ژ روویێ هژمارا تانكان ڤە تا راده‌یه‌كێ نێزیكی ئێکن، سعوودیێ 1142 تانك هه‌نه و ئیرانێ ژی 1161 تانك هەنە، به‌لێ ژ روویێ كه‌لووپه‌لێن سه‌ربازی ڤە سعوودیێ ژ ئیرانێ پتر هه‌نە، سوپایێ سعوودیه 5500 زرێپۆش و ترۆممبێلێن سه‌ربازی هه‌نه، به‌لێ ئیرانێ ژ ڤی جۆری ب تنێ 1315 هه‌نە.
دیسا وێ رۆژنامێ گوتیە، ئیرانێ د وارێ تۆپخانه و تۆپهاڤێژیێ دا ل پێشتره و خودانا 1474 راجیمه و موشه‌كانە و هەروەسا 2500 تۆپهاڤێژێن دیتر هه‌نە، به‌لێ سعوودیهێ 322 راجیمه و 1000 تۆپهاڤێژێن دیتر هه‌نە،هەروەسا دبیت ئیران د ده‌ریایێ دا شكەستنێ بگەهینیتە سعوودیه، چونكی كه‌شتیگه‌ل یا سه‌ربازی یا ئیرانێ ژ 398 پاپۆرێن جه‌نگی پێكدهێت، به‌لێ كه‌شتیگه‌ل یا سه‌ربازی یا سعوودیه 55 به‌له‌مە هەنە.
ده‌ربارەی خه‌رجیێن سه‌ربازی، ریازێ 43 ملیار جونه‌یهێن ئیسته‌رلینی ئەنکو نێزیكی (57 ملیار دۆلارێن ئەمریکی بۆ خه‌رجیێن سه‌ربازی ته‌رخانكرینە، د به‌رامبه‌ر دا ئه‌ڤ سالە تێچوویا سه‌ربازی یا ئیرانێ نێزیكی 5 ملیار دۆلاران بوویە.
هەکە مرۆڤ ته‌ماشای ڤی دۆخی بکەت، هه‌ر دوو وەلاتان خالێن لاواز ژ روویێ سه‌ربازی ڤە هه‌نه. به‌لێ هه‌ر پێنگاڤەک ب ئاراسته‌یا گرژی و دروستكرنا شه‌ری ڤە بچیت،دێ ده‌رئەنجامەکێ كاره‌ساتی لێ کەڤیت.
