شیرەتکارەکێ ئەمریکی: کوردستان دشێت رۆژھەلاتا ناڤەراست سەقامگیر بکەت
ئەڤرۆ نیوز:
شیرەتکارێ لەشکری یێ ئەمریکا (ئێرنی ئۆدێنۆ) کو ژەنەرالەکێ لەشکری یێ خانەنشینە و د رۆژنامەیێن گرنگێن جیھانی دا کارێ شەرۆڤەکرنا سیاسی دکەت، دبێژیت، درەوشا نوویا کو رۆژھەلاتا ناڤەراست تێدا دەرباز دبیت، کوردستان دشێت ببیتە فاکتەر و کیلیلا سەقامگیریا دەڤەرێ.
د بابتەکێ دا کو ل رۆژناما واشنتۆن تایمز ھایتە بەلاڤکرن، ئەو ژەنەرالێ خانەنشین دبێژیت، نوکە تورکیا ل ھەمبەری راپرسیێ دایە کو پێشنبینی دھێتە کرن ، ستراکتور و سیستەمێ دەستھەلات و برێڤەبرنا وەلاتی بھێتە گوھۆریِن، رەجەب تەیب ئەردۆگان سەرۆک کۆمارێ تورکیا ھەر نوکە ئاریشا خوە ب تورکیا دزانیت، بەلێ رۆژ پشتی راپرسیێ ھەلکێشانا وەلاتێ ئیرانێ دێ ھێتە پێش، لەورا بۆ روروبوونا وێ چەندێ بتنێ کلیلا وێ کێشێ و رزگاربوونا وێ ب فاکتەرێ کوردستانێ دێ بیت.
ب باوەریا (ئۆدێنۆی ) ، ھەموو یاریکەرێن دەڤەرێ پێدڤی ب کوردستانێ ھەیە، جوگرافیا کوردستانێ بتایبەتی دڤێ رەوشا زاڵدا، داگیرکرنا ئاخا کوردان ل عیراقێ و سووریا بۆ ئیرانێ گەلەکا گرنگە، ھەروەکی چەوا وێ دڤێت کەمەربەندەکا موکم دروست بکەت، ل عیراقێ بۆ سووریا و ل سووریا ژی ل سەر سنۆری تورکیا، بۆ باژێرێ عەفرینێ ل رۆژئاڤایا حەلەبێ، ھەتا بگەھیتە دەریایا رووسیا ل تەرتووس کو کنارێ وەلاتێ سووریا یە.
شیرەتکارێ لەشکری یێ ئەمریکا دبێژیت، دەستھەلاتدارێن ئیرانێ حەسوودیا خوە بریە ئاخا کوردستانێ ل رۆژئاڤایا مووسل، لەورا وانا دڤێت چەکدارێن حەشدا شەعبی کو د بنەرەتدا سەر ب ئیرانێ ڤەنە و ژمارا وانا 15 ھەزار کەسایە ل وێ دەڤەرێ بنەجھکرینە.
شیرەتکارێ لەشکری یێ ئەمریکا ھەروەسا ئاماژەدا ھندێ، ئەو چەکدارێن نوکە باژێرێ تەلعفەرێ داگیر کرینە کو دکەڤیتە دناڤبەرا موول و سووریا دا، ب داگیرکرنا ئاخا کوردستانێ ل وێ دەڤەرێ ئیرانێ خوە ب وەلاتێ سووریا ڤە گرێدا.
ئێرنێ ئۆدێنۆ د گۆتارا خوەدا ئاشکراکر، کور ئەمریکا و تورکیا بۆ دوبارە سەقامگیریا دەڤەرێ پێدڤی ب کوردان ھەیە کو ئیران نەشێت دەستێ خوە بسەردا بگریت، زێدباری وێ ژی گۆت: کوردستانێ ئەو رووبەرێ جوگرافی ھەیە کو رێ ل ھەمبەری پرۆژێ فرەە خوازیا و پێشڤەچوونا بەر ب دەریایا ناڤەراست دگریت ،د ڤی ئالی دا پشتی راپرسیا تورکیا ئێکەم کێشە بەرامبەری تورکیا و ئەمریکا دێ وەلاتێ ئیرانی بیت، کو نەشێت دەستبەرداری کوردستانێ ببن.
پاشی ژەنرەالێ خانەنشینێ ئەمریکی داخواز ژ ئەمریکا کر، دڤێت ئەمریکا دەڤەرەکا ئارام ل رۆژئاڤایا کوردستانێ دابمەزرینیت، ھەروەسا بنگەھەکێ لەشکری یێ مەزن یێ بەردەوام ل ھەرێما کوردستانێ بنەجە بکەت، جونکێ کوردستان کلیلا ھەڤسەنگیا ھێزێن دەڤەرێ یە و ئارمانجا ستراتیجیا ئەمریکا و تورکیا ل دەڤرەێ بتنێ ب رێیا کوردستانێ یە، لەورا پێدڤیە ئەمریکا بنگەھێن لەشکری وەکی وان بنگەھێن سەردەمێ شەرێ ساردا ل ئەلمانیا ھاتینە دروستکرن، ل کوردستانێ بھێنە دروستکرن.
