شیرەتکارەکێ UN بەحس د جوداھیا د ناڤبەرا پێشمەرگەی و حەشەد شەعبی دا دکەت
ئەڤرۆ نیوز:
شێرەتکارەکێ UN دیار دکەت کو سەربخوەیا کوردان یا نێزیک بووی و ئەڤە پتر پشتی بھارا عەرەبی یا دھێتە پێش، ئاشکرا دکەت کو تنێ مەترسیا ل سەر دوزا کوردی دڤێ قوناغێ دا نەبوونا گۆتارەکا ئێکگرتی یە.
وریا قەرەداغی شیرەتکارێ ڕێکخراوا نەتەوێن ئێکگرتی، د ھەڤدیتنەکێ دا ل گەل ڕۆژناما ئەڤرۆ بەحسێ، دیتنا ڤێ ڕێکخراوا جیھانی دکەت بۆ مللەتێ کورد و دبێژیت” ھەتا سالا 2000 ێ کێشا کوردان دھاتە دیتن وەکو کێشەکا مرۆڤایەتی، پشتی ژناڤچوونا ڕژێما بەعس و ھاتنا بھارا عەرەبی، کورد وەکو نەخشێ سیاسی ھاتنە پێش و کێشا وان بۆ کێشەکا سیاسی”.
وریای ل دۆر ب دووماھی ھاتنا ڕێککەفتناما سایکس بیکۆ دبێژیت” ھەکە ئەمریکا و رۆسیا و چین و ئەورۆپا کێشا کوردی چارەنەکەن دێ بنە فاکتەرەکێ نە ئارام ل دەڤەرێ ب گشتی و ئەڤە ژی دبەرژوەندیا ئەمریکا و ئەورۆپا دا نینە، دڤێت کورد ژی بھێنە پێش و ب ئێک گۆتار و ئێک دەنگ”.
ل دۆر پرسا ڕیفراندۆمێ، وریای گۆت” ئەنجامدانا ڕیفراندۆمێ دڤێت پلان ھەبیت و ئەو پلان بھێتە پارڤەکرن و نە ڕیفراندۆمێ بکەی و تە دوژمن ھەبیت، پێدڤیە بۆ حوکمەتا عیراقێ بھێتە دیارکرن کو ڕیفراندۆم مافێ مللەتێ کوردە، ئەنجامدانا ڕیفراندۆمێ دێ یا بزحمەت بیت، بەلێ نوکە ھەر دو وەلاتێن سوریا و عیراقێ دلاوازن و ئەڤە بۆ کوردان، “.
ل دۆر ھەلویستێ UN ژ ڕیفراندۆمێ، گۆت” ئەو سازیەکا دبلوماسی یە و ل گەل دا کارێ رێکخەریێ دکەت و نە سازیەکا سیاسی و ژ 200 وەلاتیان پێک دھێت و بریار د دەستێ پێنچ وەلاتان دایە(ئەمریکا، رۆسیا، بریتانیا، فرەنسا، چین)، دڤێت پلانەک ھەبیت ئەڤ وەلاتە پشتەڤان بن، un چ ھێز نینە ل سەر ئەڤان پێنچ وەلاتان، پێدڤیە وەلاتەک ژوان ھەر پێنچ وەلاتان بھێتە ڕازیکرن و ھەکە ئەڤ پێنچ وەلاتە ڕازی بن، ژنوو نەتەوێن ئێکگرتی دچیتە دناڤ کێشێ دا”.
ب دیتنا وریا قەرەداغی، نڤێسنگەھێن حوکمەتا ھەرێمێ ل دەرڤە نەچووینە دناڤ لوبیا سیاسی دا و کار بکەن بۆ کێشانا وەلاتێن زلھێز کو پشتا کوردان بگرن، مەنگولیا ل سالا 1963 کێشا کوردان گەھاندە نەتەوێن ئێکگرتی و دیارکر کو حوکمەتا بەعس یا زولمێ ل کوردان دکەت.
ھێشتا گۆت” مەترسی یێن ھەین ئەڤ دەلیڤا بۆ کوردان ھاتی، ژ دەستان بچیت، چونکی دوژمنێن ناڤخوەیی یێن ھەین کو د زەحمەتترن ژ دوژمنێن دەرەکی، دیسا قەیرانا دارایی ژی کارتێکرنا خوە یا ھەی کو ئەڤە چەند ھەیڤە فەرمانبەران مووچە نە وەرگرتی”.
سەبارەت دەڤەرێن کوردستانی یێن دەرڤەی ئیدارا ھەرێمێ و دیتنا UN ل سەر ئەگەر ھات و کوردستانێ سەربخوەیا خوە وەرگرت کا وەک کێشەکا نێڤدەولەتی دێ ھێتە دیتن، گۆت”un سەحدکەتە ڤێ کێشێ وەکو کێشەکا سیاسی و حوکمەتا بەغدا دبینیت وەکو کێشەکا ناڤخوەیی، ئەوا نوکە دھێتە سەرێ کوردان ھێشتا ئەنجامێ شەڕێ چالدیرانە، کێشا مووسل وەک شەڕێ چالدیرانە و پێشبینیێ دکەین پشتی نەمانا داعشێ، عیراق پارچە ببیت و پێکئینانا ھەرێما سونی یا نێزیکە”.
ھەمبەر دیتنا UN بۆ پێشمەرگەی ژی، وریا قەرداغی گۆت”ب دیتنا UN پێشمەرگە باشترین ھێزە و فاکتەرێ تەناھیێ و ئارامیێ یە ل دەڤەرێ و بارناکەم حەشد شەعبی د فەرھەنگا UN دا فاکتەرێ ئێمناھیێ بیت، تنێ ئاگرێ شەڕێ تائیفی گەشت دکەت”.
زێدەتر وریا گۆت” بھارا عەرەبی دبەرژوەندا مللەتێ کورد دابوو و سەربخوەیا کوردستانێ نێزیکتر لێ کر، ژ دامەزراندنا دەولەتا عیراقێ ھەتا نوکە تەناھی و ئارامی ڤی خەلکی نەدیتی یە و پێشبینیێ دکەم عیراق دێ وەک پێشتر ڤەگەریت ئانکو ھەرێمێن سونی و شیعی و کوردستان.
