شیشانیان ل ئەلمانیا ب چەقۆیان ھێرش کرە سەر کوردێن ئێزدی
ئه‌ڤرۆ نيوز:
بەرپرسێ پشکا رەوشەنبیری ل بنگەھێ لالش ل وەلاتێ ئەلمانیا دیار کر، گرۆپێن ئیسلامی یێن ئەفغانی و شیشانی ب چەقۆیان ھێرش کرە سەر ئێزدیان ل کەمپا بیلیفیلدا ل وەلاتێ ئەلمانیا و د ئەنجام دا پێنچ گەنجێن ئێزدی برینداربوون، بنگەھێ لالش داخوازێ ژ حوکمەتا ئەلمانیا دکەت، ئێزدیێن کەمپێ ڤەگوھێزتە جھەکێ دی، پۆلیسێن باژێرێ بیلیفیلدا ھژمارەکا گەنجێن گرۆپێ ھێرش کریە سەر وان دەستەسەرکرن.
دلشاد سمۆ جۆقی، بەرپرسێ پشکا رەوشەنبیری ل بنگەھێ لالش ل وەلاتێ ئەلمانیا بۆ ئەڤرۆ گۆت: “بنگەھێ لالش د ھەولێن بەردەوام دایە بۆ ڤەگوھاستنا خێزانێن ئێزدی ژ کەمپا بیلیفیلد ل وەلاتێ ئەلمانیا، گرۆپێن ئیسلامی یێن ئەفغانی و شیشانی ب رێیا چەقویان ھێرشی گەنجێن د ناڤ کەمپێ دا کرینە، د ئەنجام دا ھژمارەکا گەنجێن ئێزدی ھاتینە بریندارکرن، ھەر چەندە پۆلیسێن کەمپێ کۆنترول ل سەر بوویەرێ کرینە، لێ ئەم د رژدین بۆ ڤەگوھاستنا خێزانێن ئێزدی ژ ناڤ ڤان گرۆپێن ئیسلامی یێن ئەفغانی و شیشانی، دا کو ژیانا وەلاتیان یا پاراستی بیت ژ ھەر مەترسیەکێ د ناڤ کەمپێ دا”.
ناڤبری ئەو ژی دیار کر کو گەنجێن بریندار ھەموو بۆ نەخۆشخانێ ھاتینە رەوانەکرن، بنگەھێ لالش یێ بەردەوامە ل سەر چارەسەرکرنا ئاریشا روودایی ب رێیا وەرگرتنا پێرابوونێن قانوونی بەرامبەر کەسێن ھێرش کرین و دیتنا رێیێن گونجای بۆ نەھێلانا دووبارەبوونا روودانێ.
دلشاد سمۆ گۆتژی: “ئێزدی ھەموو ژ کەمپا بیلیفیلد ھاتنە ڤەگوھاستن بۆ کەمپا ھیرفورد ل ئەلمانیا و گرۆپێن شیشانی و ئەفغانی ژی بۆ جھێن نەدیار ھاتینە ڤەگوھاستن و ئەو کەسێن ب چەقۆیان ھێرش کریە سەر ئێزدیان ھەموو ھاتنە دەستەسەرکرن و دێ پێرابوونێن قانوونی ل گەل ھێنە کر”.