شێوێ حوكمرانیا هه‌رێمێ بلا ب راپرسیێ بهێته ئێكلاكرن
ئه‌ڤرۆنیۆز، ئه‌یاد به‌روارى
ئه‌ندامه‌كێ سه‌ركردایه‌تیا پارتی دیموكراتی كوردستان داخواز كر پرسا سیسته‌مێ حوكمرانیێ ل هه‌رێما كوردستانێ بكه‌ڤیته راپرسیێ.
عه‌لی عه‌ونی د په‌یچێ خوه دا ل سه‌ر تۆرا جڤاكی یا فیسبووكی دبێژیت” نوكه ل هه‌رێما كوردستانێ دو بوچوون یێن هه‌ین، یا ئێكێ سه‌رۆكێ هه‌رێما كوردستانێ ژلایێ خه‌لكی ڤه بهێته هه‌لبژارتن، یا دویێ ژى سه‌رۆكێ هه‌رێمێ ل په‌رله‌مانێ كوردستانێ بهێته هه‌لبژارتن”.
عه‌لی عه‌ونی ئه‌گه‌رێ هه‌تا نوكه ده‌نگ نه‌دان ل سه‌ر دستوورێ هه‌رێمێ بۆ ڤێ چه‌ندێ دزڤرینیت و دبێژیت” هه‌تا نوكه باشوورێ كوردستانێ یێ بێ دستووره و لیژنا هاتیه پێكئینان دێ ل سه‌ر وێ خالێ گه‌هنه بنبه‌ست و ئاسته‌نگیان”.
ل دووڤ بوچوونا ڤی ئه‌ندامێ سه‌ركردایه‌تیا پارتی، دووماهی ئینان ب گه‌نگه‌شا ل سه‌ر ڤی بابه‌تی، ئه‌نجامدانا راپرسیێ یه ل سه‌ر وێ خالێ كا گه‌لێ كوردستانێ حه‌ز دكه‌ن ئه‌و سه‌رۆكێ هه‌رێمێ هه‌لبژێرن یان حزب و لایه‌نێن سیاسی دناڤ په‌رله‌مانی دا.
