شەبەک دخوازن پێشمەرگە دەڤەرێن وان رزگار بکەن
ئەڤرۆ نیوز:
نوونەرێ کوردێن شەبەک ل جڤاتا نوونەرێن عیراقێ (سالم جومعە) بۆ رۆژناما ئەڤرۆ دیارکرکو کوردێن شەبەک یێن بەرھەڤیان دکەن بۆ ناڤ نڤیسنێ بۆ دروستکرنا فەوجەکا خوەبەخش و ھەتا نوکە دو ھزار وەلاتیان ژ کوردێن شەبەک ناڤێن خوە تۆمارکرینە وەکو خوەبەخش مل ب ملێ پێشمەرگێ کوردستانێ بۆ وێ چەندێ کو شەڕێ ئازادکرنا دەڤەرێن خوە بکەن و ژ تیرۆرستان پاقژ بکەن و دێ ھەتا چار ھزار خوەبەخش ھێنە تۆمارکرن و ناڤێن ھەموویان ژی بۆ وەزارەتا پێشمەرگەی دێ ھێنە ھنارتن کو دێ ل بن چاڤدێری و رێنمایێن وەزارەتا پێشمەرگەی ئەرکێ خوە ئەنجام دەن.
سالم جومعە نوونەرێ کوردێن شەبەک ل جڤاتا نوونەرێن عێراقی گوت” داخوازێ ژ سەرۆک بارزانی دکەین راستەوخوە سەرپەرشتیا شەڕی ئازادکرنا دەڤەرێن کوردێن شەبەک بکەت وەکو شنگالێ و ھەموو دەڤەرێن کوردێن شەبەک ژی ژ تیرۆرستان بھێنە پاقژکرن و ئازادکرنا شنگالێ نە ب تنێ کوردێن شەبەک، بەلکو ھەموو ئاوارێن دەشتا نەینەوا دلخوەش کرینە وھیڤیەکا مەزن ددلێ خەلکێ دا دروستکر بۆ ئازادکرنا ھەموو دەڤەران ونەھێلانا تیرۆرستان”.
سالمی دیارکرکو ب پشتەڤانیا حوکمەتا ھەرێما کوردستانێ و سەرۆک بارزانی فەوجەکا تایبەت بۆ کوردێن شەبەک یا ھاتیە پێکئینان و ژ 655 پێشمەرگان پێک دھیت و نوکە ل میحورێ خازری فەوجا کوردێن شەبەک شەڕێ ژناڤبرنا تیرۆرستان دکەت وگۆت ژی” فەوجەکا دی ژی یا ب رێڤەیە و ناڤ یێن ھاتینە بلندکرن بۆ وەزارەتا پێشمەرگەی و پشتی ئەوژی دھێنە مەشقدان، دێ پشکداریێ د شەڕێ تیرۆرستان دا کەن”.
سالم جومعە ئەوژی دیارکرکو رێژا 80% کوردێن شەبەک ئاوارەی ھەرێما کوردستانێ بووینە و ئەم داخوازێ دکەین ھیزێن پێشمەرگەی ب سەرپەرشتیا راستەوخوە یا سەرۆک بارزانی وەکو شنگالێ دەڤەرێن کوردێن شەبەک ژی ئازاد بکەن و ئێدی کوردێن شەبەک خوە ل ھیڤیا بجھئینانا مادێ 140 ناگرن، چونکی حوکمەتا عیراقێ نەڤێت مادێ 140 بجە بینیت، لەوما ژی ئەم وەکو کوردێن شەبەک ئێدی ب چو شیوەیەکێ بیت ناڤەگەرینە سەر ب پارێزگەھا نەینەوا ڤە و دێ سەر ب ھەرێما کوردستانی ڤە بین ژبەر کو ب راستی ژی ژبلی خیانەتێ ومال وێرانیێ، عیراقێ چو بۆ دەڤەرێن کوردێن شەبەک نەکریە”.
