شەش هزار دەرچوویێن ئێكێ دێ هێنە دامەزراندن
هەولێر، قائید میرۆ:
پەرلەمانتارەكا پارتی ل پەرلەمانێ ئیراقێ ب فەرمی داخواز ژ سەرۆكێ جڤاتا راژەی ل ئیراقێ كر و داخواز كریە شەش هزار دەرچوویێن ئێكێ ل سەر ئاستێ زانكۆیێن هەرێما كوردستانێ بهێنە دامەزراندن و دبێژیت: ئەم پشتەڤانیا راسپاردا سەرۆكێ حوكمەتا هەرێما كوردستانێ دكەین بۆ دامەزراندنا ئێكەمێن هەرێمێ و ئەركێ بەغدایە دابمەزرینیت.
دكتۆرە نەهلا ئەفەندی، جێگرا سەرۆكێ لیژنا خواندنا بلند ل پەرلەمانێ ئیراقێ بۆ رۆژناما ئەڤرۆ گۆت: «مە پشكداری د كۆمبوونا لیژنا خواندنا بلند و ڤەكۆلینێن زانستی یا پەرلەمانێ ئیراقێ دا كر، كو مێهڤانداریا مەحموود تەمیمی، سەرۆكێ جڤاتا راژەی ل حوكمەتا ئیراقێ كربوو و تێدا مە داخواز كر ئێكەمێن سەر ئاستێ زانكۆیێن هەرێما كوردستانێ بهێنە دامەزراندن و هەژمارا وان شەش هزار دەرچووینە و ئەركێ حوكمەتا فیدڕالە ئەو شەش هزار دەرچوویێن ئێكێ بهێنە دامەزراندن، چونكی نوكە پشكا بودجەیا هەرێما كوردستانێ ژ لایێ بەغداڤە دهێتە مەزاختن».
جێگراسەرۆكا لیژنا خواندنا بلند گۆتژی: «مەسرور بارزانی، سەرۆكێ حوكمەتا هەرێما كوردستانێ لایەنێن پەیوەندیدار راسپاردینە ل گەل حوكمەتا ئیراقێ هەماهەنگیێ بكەن ژ بۆی دامەزراندنا سێ ئێكەمێن سەر ئاستێ هەرێما كوردستانێ، ئەم ژی پشتەڤانیا راسپاردا سەرۆكێ حوكمەتێ دكەین و دێ هەموو بزاڤەكێ بۆ دامەزراندنا دەرچوویێن ئێكێ كەین».
