شەش کەس سەرا دزینا مووچەی دھێنە دەستەسەرکرن
ئه‌ڤرۆ نيوز:
ئەندامەکێ جڤاتا پارێزگەھا نەینەوا دیار کر کو بڕیارا دەستەسەرکرنی بۆ حەفت کەسان سەرا دزینا مووچێ کارمەندێن ساخلەمیا مووسلێ دەرکەفتیە و گۆت: ھەتا نوکە شەش کەس ژ وان یێن ھاتینە دەستەسەرکرن و ڤەکۆلین بۆ ئاشکراکرنا چارەنڤیسێ مووچێ کارمەندێن ساخلەمیا مووسلێ یا بەردەوامە.
سەیدۆ حسێن تاتانی، ئەندامێ جڤاتا پارێزگەھا نەینەوا بۆ ئەڤرۆ ئاشکرا کر، جڤاتا پارێزگەھا نەینەوا د کۆمبوونا خوە دا بڕیار دا حوکمەتا عیراقێ مووچێ ھەیڤا ئیک و دوو یێ ئەڤ سالە یێن کارمەندێن ساخلەمیا مووسلێ ب مەزیخت ھەتا بادەکا ڤەکۆلینێ ب دووماھیێ دھێت و گۆت: “وەسا دیارە بەغدا رازی نەبوویە و چاڤەرێی بڕیارا دادگەھێ دکەت بۆ ئیکلایکرنا مووچێ وان”.
خویا ژی کر، ئەڤ سالە 11 ملیار و 800 ملیۆن دینارێن مووچێ ھەیڤا ئیک و دو یێ کارمەندێن ساخلەمیا مووسلێ ھاتینە دزین و گۆت: “ل دووڤ ڤەکۆلینان دبیژن کۆمپانیا (عبر الخلیج) ئەو پارە بریە، لێ ھیشتا ئەڤ چەندە ئاشکرا نەبوویە”.
گۆتژی: “پێنچ کارمەند ل گەل رێڤەبەرێ ساخلەمیا مووسل سەرا دزینا مووچەی ھاتینە دەستەسەرکرینە و ڤەکۆلین ل سەر ڤی بابەتی یا بەردەوامە”.
