شەھیدێن خوە بەخش وەکو شەھیدێن سەنگەر ھاتنە قەبوولکرن
ئەڤرۆ نیوز:
پەیڤدارێ وەزارەتا شەھید و ئەنفالکریان ل حوکمەتا ھەرێما کوردستانێ ئاماژە ب ڤێ چەندێ دکەت، کو ئاریشا شەھیدێن خوە بەخش یێن د شەڕێن دژی تیرۆرستێن داعش دا شەھیدبووین ھاتە چارەسەرکرن و ھەر وەلاتیەکێ پێشمەرگە و ھێزێن ناڤخوە نەبیت و د شەڕێن دژی داعشێ دا شەھید ببیت وەکو شەھیدێ سەنگەر دێ ھێتە تۆمارکرن.
فوئاد عوسمان، پەیڤدارێ وەزارەتا شەھید و ئەنفالکریان یا حوکمەتا ھەرێما کوردستانێ بۆ رۆژناما ئەڤرۆ گۆت: “بەری نوکە ئاریشەک ل دانا مووچە و ئیمتیازاتان بۆ وان وەلاتیێن خوە بەخش ئەوێن د شەرێن دژی تیرۆرستێن داعشێ دا شەھیدبووین ھەبوو، بەلێ حەفتیا بۆری وەزارەتا شەھید و ئەنفالکریان د گەل لایەنێن پەیوەندیدار شیا ئەڤێ ئاریشێ چارەسەربکەت، چونکو بەرێ ھەر وەلاتیەکێ خوە بەخش ل شەڕێ داعش شەھید ببایە، ھندەک ئاریشێن قانوونی و رێنمایی ھەبوون، بەلێ ئەم گەھشتینە ئەنجامەکی و نوکە وێرسێن وان شەھیدێن خوە بەخش دشێن مامەلێن شەھیدێن خوە وەکو شەھیدێن سەنگەری بکەن و چو ئاریشە بۆ پەیدانابن”.
فوئادی ئاشکرا ژی کر، ل گۆرەی بڕیارا وەزارەتێ ھەر وەلاتیەکێ د شەڕێن دژی داعشێ دا شەھید ببیت، وەکو پێشمەرگێ شەھیدێ سەنگەری ھەموو ماف و ئیمتیازات دێ ھەبن، ھەروەسا ل پێدانا پارچەیەکا ئەردی و مووچێ شەھیدان ژی دێ مفاداربیت و گۆت: “ژ نوکە پێڤە ژی ھەر مافەک بۆ کەسوکارێن شەھیدان بھێتە دان، ب ھەمان شێوە دێ بۆ شەھیدێن خوە بەخش ژی ھێتە دان، ھەر بۆ ڤێ مەرەمێ پلە ژی بۆ شەھیدێن خوە بەخش ھاتینە دان و ئەگەر بەری نوکە فەرمانبەربیت یان پلە و پۆستەک ھەبیت ئێکسەر د گەل شەھیدیێ دێ دو پلە بۆ ھێنە زێدەکرن”.
