عادل عه‌بدولمه‌هدى دێ ژ به‌ر دو مه‌ره‌مان سه‌ره‌دانا هه‌ولێرێ كه‌ت
ئه‌ڤرۆ نيوز:
سه‌رۆكا فراكسيۆنا پارتى ل جڤاتا نوونه‌رێن عيراقێ راگه‌هاند كو شانده‌كێ بلندێ حوكمه‌تا عيراقێ ب سه‌رۆكاتيا سه‌رۆك وه‌زيران بۆ دو مه‌ره‌مان دێ سه‌ره‌دانا هه‌رێما كوردستانێ كه‌ن؛ يا ئێكێ پيرۆزباهيكرنه، يا دويێ ژى دانوستاندنه ل گه‌ل سه‌ركردێن كورد د ده‌باره‌ى كێشێن هه‌لاويستى دا.
د. ڤيان سه‌برى، بۆ مالپه‌رێ فه‌رمى يێ پارتى ديموكراتى كوردستان گۆت: “شانده‌كێ حوكمه‌تا عيراقێ ب سه‌رۆكاتيا عادل عه‌بدولمه‌هدى سه‌رۆك وه‌زيرێن عيراقێ، بۆ دو مه‌ره‌مان دێ سه‌ره‌دانا هه‌رێما كوردستانێ كه‌ت؛ يا ئێكێ پيرۆزباهيكرنه ل نێچيرڤان بارزانى سه‌رۆكێ هه‌رێما كوردستانێ، يا دويێ ژى دانوستاندنه ل گه‌ل سه‌ركردايه‌تيا كوردى ل دۆر كێشێن هه‌لاويستى يێن ناڤبه‌را هه‌رێما كوردستانێ و به‌غدا دا”.
گۆتژى: “بڕيار ل سه‌ر سه‌ره‌دانێ هاتيه دان، به‌لێ هێشتا ده‌مێ سه‌ره‌دانێ نه‌هاتيه دياركرن به‌لێ دهێته چاڤه‌رێكرن ب ڤان نێزيكان بيت، چونكو كۆمه‌كا فايلان هه‌نه پێدڤيه د ناڤبه‌را هه‌ولێر و به‌غدا دا بهێنه چاره‌كرن”.
