عسمەت رەجەب: تیرۆرستێن داعش یآ بارەگایێن خوە ل مووسل چۆل دکەن
دھۆک، لەزگین جۆقی:
بەرپرسی لقی 14 پارتی دیموکراتی کوردستان ل مووسل بۆ ئەڤرۆ دیارکر کو دو کەمپ ل ھەرێما کوردستانی بۆ مەشق و راھێنانا لەشکەری بۆ ئازادکرنا مووسل دی ھێنە دانان بۆ وان ھێزێن بریار ل سەر ھاتیە دان ل وەزارەتێن ناڤخوە و بەرگیریا عیراقێ.
عسمەت رەجەب بەرپرسی لقی 14 پارتی دیموکراتی کوردستان بۆ ئەڤرۆ گوت”ئەڤە دەمەکە بارودۆخی دناڤ باژێرێ مووسلێ دا گەلەک یێ نەخوەش بووی کو ژلایی ئابووری ڤە ژیانا خەلکی گەلەک یا ب زەحمەت کەفتی و کار نێنە و بھایێ کەلوپەلان گەلەک یێ گران بووی و تیرۆرستێن داعش نەشیاینە کارەبێ و ئاڤێ دابین بکەن بۆ وەلاتیێن مووسلێ و ئەڤە 28 رۆژن کارەب ژ باژێری مووسل یا ھاتیە بڕین”.
عسمەت رەجەب ئاماژە دا وێ چەندێ کو ژلایی دەروونی ڤە ژێ خەلکێ مووسل نەیێ ئارامە و د ترسێ دا دژین ژ بەر کو رۆژانە تیرۆرستێن داعش یێ خەلکەکی دەستەسەردکەن بێ کو ئەگەر ژێ بھێنە ئاشکراکرن و خەلکی دکوژن و تەرمێن وان د ھاڤێژن و ڤان کریاران دکەن، دا پتر ترس دناڤ خەلکێ دا پەیدابیت.
بەرپرسی لقی 14 یێ پارتی گوت ژ”ی ئەو ئەفسەر و پۆلیسێن (توبە کرین) و ماینە د مووسلێ دا، ئەڤە دەمەکە ھژمارەکا مەزن ژوان ئەفسەرێن لەشکەری عیراقی و پۆلیسێن عیراقی ھاتینە گرتن و تیرۆرستێن داعش وان ژی دکوژیت یێن توبە ژی کرین ل وی دەمێ تیرۆرستنێن داعش مووسل کونترۆلکری”.
عسمەت رەجەب ئاماژە دا وی چەندێ کو ژ ئەگەرێ وێ ترسا کەفتیە دناڤ رێزێن تیرۆرستێن داعشدا، گەلەک ژ بارەگایێن خوە یێ چۆل دکەن و یێ دچنە دناڤ تاخ و مالێن وەلاتیاندا ب تایبەتی ژی پشتی فرۆکێن ھەڤپەیمانان دەست ب تۆپبارانکرنا بارەگایێن تیرۆرستان کری یێن کو خوە دناڤ خەلکێ دا ڤەدشیرن و دربێن مەزن لێ داینە ب تایبەتی ژێ د ناڤبەرا مووسلێ و ئەنبارێ دا کو سەرکردێن داعش خرڤەدبوون و ھاتنوچوون بۆ ھەردو پارێزگەھان دکرن و خوەش بەختانە فرۆکێن ھەڤپەیمانان کرنە ئارمانجێن خوە و چەندین سەرکردێن داعش کوشتن.
بەرپرسی لقی 14 پارتی ئاشکرا کرکو دناڤ سەنتەرێ باژێرێ مووسلێ ب خوە ژی دا گرۆپ پەیدابووینە دژی تیرۆرستێن داعش و شەڕی دژی داعش دکەن و ب رێیا مەفرەزێن دناڤ چاداندا تیرۆرستێن داعش دکوژن و ئەڤە بوویە ئەگەرا ھندێ تیرۆرستێن داعش بۆ خوە ڤەدزینی ژ جھەکێ بۆ جھەکێ دی گەلەک نھێنی بکەن و یێ ترۆمبیلێن خوە ژی دگوھۆرن دا و رێیێن خوە ژی د گوھۆرن.
خویاکر ژی کو پێشمەرگێ کوردستانی َو ھێزین ھەڤپەیمانان دێ رۆلەکێ گرنگ د رزگارکرنا مووسلێ دا ھەبیت و لەشکری عیراقێ پشتی شکەستن خواری ل مووسل و بجە ھێلانا بارەگایێن خوە، ب وی شێوەی نەمایە کو بشێت بەرگریێ ژ خوە بکەت، یان ھێرشێ بکەتە سەر تیرۆرستێن داعش.
