عه‌بادى به‌حسێ گرنگيا كاراكرنا هه‌موو ده‌ستهه‌لاتێن فيدرالى ل هه‌رێما كوردستانێ دكه‌ت
ئه‌ڤرۆنيوز:
نڤيسينگه‌ها راگه‌هاندنێ يا سه‌رۆك وه‌زيرێن عيراقێ راگه‌هاند، حه‌يده‌ر عه‌بادى ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ به‌حسێ گرنگيا كاراكرنا هه‌موو ده‌ستهه‌لاتێن فيدرالى يێن حوكمه‌تا عيراقێ ژوان ژى ده‌رگه‌هێن سنورى وفرۆكخانه‌يان ل هه‌رێما كوردستانێ كر.
دياركر ژى”سه‌رۆك وه‌زيرێن عيراقێ دووپاتى ل سه‌ر ئێكگرتن وسه‌روه‌ريا عيراقێ كر وئاماژه دا كو وه‌لاتيێن هه‌رێمێ پشكه‌كن ژ گه‌لێ عيراقێ”.
گۆت ژى” دكۆمبوونا عه‌بادى وبارزانى دا به‌حسێ ره‌وشا سياسى وئه‌منى وچاره‌سه‌ركرنا كێشێن دناڤبه‌را حوكمه‌تا عيراقى وهه‌رێمێ ل دووڤ دستوورێ عيراقێ هاته كرن”.
نڤيسينگه‌ها راگه‌هاندنا سه‌رۆك وه‌زيرێن عيراقێ خوياكر” حه‌يده‌ر عه‌بادى ئاماژه ب به‌رده‌وامبوونا كارێ لژنێن تايبه‌تمه‌ند ب ڤه‌كرنا فرۆكخانان كر پشتى تمامكرنا هه‌موو پێرابوونێن پێدڤى ب ڤه‌گه‌راندنا هه‌موو ده‌ستهه‌لاتێن فيدرالى بۆ فرۆكخانان ودياركر كو پێدڤيه هه‌موو سنورێن نێڤده‌وله‌تى يێن عيراقێ دبن ده‌ستهه‌لاتا فيدرالى بن، ژبه‌ركو ئه‌و چه‌نده ژ ده‌ستهه‌لاتێن ره‌ها يێن حوكمه‌تا فيدرالى نه”.
به‌لاڤكر ژى”عه‌بادى هه‌لويستێ حوكمه‌تا عيراقى دووباره‌كر ب پێدڤيا پێگيريكرنێ ب سنورێن هه‌رێما كوردستانێ يێن دستوورى به‌حس لێكرى وگرنگيا راده‌ستكرنا په‌ترۆلا ده‌رئيناى بۆ حوكمه‌تا فيدرالى وفرۆشتنا په‌ترۆلا تنێ ژلايێ حوكمه‌تا فيدرالى ڤه بهێته ئه‌نجامدان ب رێيا كۆمپانيا سۆمۆ”.
ل دووڤ نڤيسينگه‌ها راگه‌هاندنێ يا سه‌رۆك وه‌زيرێن عيراقێ” حه‌يده‌ر عه‌بادى به‌حسێ گرنگيا تمامكرنا كارێ لژنێن پێداچوونا مووچێن فه‌رمانبه‌رێن هه‌رێمێ كر وداخوازكر له‌زكرن د مه‌زاختتنا وان مووچان دا بهێته كرن وگره‌نتيا گه‌هشتنا وان مووچان بۆ ده‌ستێ فه‌رمانبه‌رێن شايسته‌يێن وان مووچان وئه‌و مووچه دبن چاڤدێريا ديوانا چاڤدێريا دارايى يا فيدرالى دا بن”.
