عه‌بادى دێ سه‌ره‌دانا هه‌رێمێ كه‌ت
ئه‌ڤرۆ نيوز:
ئه‌ندامه‌كێ وه‌ڤدێ دانوستاندكارێ هه‌رێمێ كوردستانێ ل گه‌ل حوكمه‌تا عيراقێ راگه‌هاند كو عه‌بادى داخوازيا سه‌رۆكێ هه‌رێمێ بۆ سه‌ره‌دانكرنا هه‌ولێر ب خوه‌شحالى ڤه قه‌بوول كر.
سكرتێرێ جڤاتا وه‌زيران ل هه‌رێما كوردستانێ د داخۆيانيه‌كێ دا بۆ تۆرا ده‌نگوباسێن سلێمانيێ راگه‌هاند كو نێچيرڤان بارزانى سه‌رۆكێ وه‌ڤدێ دانوستاندكارێ هه‌رێما كوردستانێ ل گه‌ل حوكمه‌تا عيراقێ د ماوێ روونشتنێن ل گه‌ل حه‌يده‌ر عه‌بادى سه‌رۆكێ جڤاتا وه‌زيرێن عيراقێ دا، ب فه‌رمى عه‌بادى بۆ سه‌ره‌دانكرنا كوردستانێ داخواز كر.
ئارمانج ره‌حيم سكرتێرێ جڤاتا وه‌زيران ل هه‌رێما كوردستانێ گۆت: “عه‌بادى ب خۆشحالى ڤه داخوازناما بارزانى قه‌بول كر و د داهاتى دا سه‌ره‌دانا هه‌ولێر كه‌ت”.
سكرتێرێ جڤاتا وه‌زيران ل دۆر ده‌مێ سه‌ره‌دانا سه‌رۆك وه‌زيرێن عيراقێ بۆ هه‌ولێر گۆت: “ده‌مێ وێ يێ ديار نينه”.
داخوازكرنا عه‌بادى د ده‌مه‌كى دايه كو هه‌ولێر و عيراق ل سه‌ر پرسا په‌ترۆل و بودجێ رێكه‌فتينه و به‌رپرسێن هه‌ردو لا ژى ب گرنگى ته‌ماشه‌ى وێ رێكه‌فتنێ دكه‌ن.
