عه‌بادى قانوونا ئيمتيازاتێن خانه‌نشينيا په‌رله‌مانتارێن عيراقێ ره‌تكر
ئه‌ڤرۆنيوز:
سه‌رۆك وه‌زيرێن عيراقێ قانوونا ئيمتيازاتێن په‌رله‌مانتارێن عيراقێ ره‌ت دكه‌ت وتانێ ل وێ قانوونێ دده‌ت.
نڤيسينگه‌ها راگه‌هاندنا يا حه‌يده‌ر عه‌بادى سه‌رۆك وه‌زيرێن عيراقێ، ئه‌ڤرۆ ئه‌ينيێ 20 تيرمه‌ها 2018 دبه‌ياننامه‌كێ دا راگه‌هاند” سه‌رۆك وه‌زيران قانوونا ماف وئيمتيازاتێن په‌رله‌مانتاران ره‌تكر كو ژلايێ خۆلا بۆرى يا په‌رله‌مانێ عيراقێ ڤه ب شێوه‌كێ مژه‌وى هاتيه په‌سه‌ندكرن وسه‌رۆكێ كۆمارێ ژى ئه‌و قانوونه كاراكريه”.
د به‌يانناما نڤيسينگه‌ها راگه‌هاندنێ يا عه‌بادى ئاماژه ب وێ چه‌ندێ هاتيه كرن” حه‌يده‌ر عه‌بادى دێ تانێ ل سه‌ر وێ قانوونێ پێشكێش كه‌ت، ژبه‌ركو رازيبوونا حوكمه‌تا بۆ نه‌هاتيه وه‌رگرتن، دده‌مه‌كى دا ئه‌و قانوون لايه‌نێ ئابوورى ب خوه‌ڤه دگريت”.
به‌رى نوكه دمه‌رسومه‌كێ كۆمارى دا، فوئاد مه‌عسووم سه‌رۆك كۆمارا عيراقێ ئيمزا ل سه‌ر خانه‌نشينكرنا 328 په‌رله‌مانتارێن خۆلا سيێ يا په‌رله‌مانێ عيراقێ كربوو كو ئه‌و خۆله ل رۆژا 30 خزيرانا 2018 ب دووماهى هاتبوو.
دوێ كه‌رسووما كۆمارى دا، داخواز ژ سه‌رۆكێ په‌رله‌مانێ عيراقێ ووه‌زيرێ دارايى ل عيراقێ هاتيه كرن وێ بريارێ بجهبينن.