عه‌بادى ل به‌ره ڤى كارى دژى هه‌رێما كوردستانێ بكه‌ت
ئه‌ڤرۆنيوز:
ئه‌ندامه‌كا جڤاتا نوونه‌رێن عيراقێ راگه‌هاند، عه‌بادى ل به‌ره دمه‌زاختنا پارێن گه‌نمێ جوتيارێن هه‌رێما كوردستانێ سته‌مێ بكه‌ت ومافێن وان پێشيل بكه‌ت داخوازێ ژ سه‌رۆك كۆمار وهه‌موو نوونه‌رێن كوردان ل به‌غدا دكه‌ت ژى فشارێ ل سه‌ر عه‌بادى بكه‌ن.
ئه‌شواق جاف ئه‌نداما جڤاتا نوونه‌ران ژ ليستا پارتى ل دۆر پارێن گه‌نمێ جوتيارێن هه‌رێما كوردستانێ، گۆت” ئه‌ڤرۆ من په‌يوه‌ندى ب وه‌زيرێ بازرگانيا عيراقێ كر، دبه‌رسڤێ دا گۆته من كو سه‌باره‌ت پارێ 2017 هه‌تا نوكه جڤاتا وه‌زيران بريار ل سه‌ر مه‌زاختنا وى نه‌دايه، به‌لێ پارێ 2016 يێ هاتيه دان بۆ هه‌ردو به‌نكێن رافيده‌ين وره‌شيد”.
ئه‌شواقێ زێده‌تر بۆ باسنيوز گۆت” دبيت كارێن به‌نكا ره‌شيد دو رۆژان ڤه‌كێشن وپاشى به‌لاڤ بكه‌ت، ئه‌وێن ماين ژى پارێن 2014 و2015 يێن جوتيارێن هه‌رێما كوردستانێ، كێشه يا تێدا هه‌ى”.
دياركر ژى” هه‌تا نوكه چو پاره‌ك بۆ وان دو سالان نه‌هاتيه دانان، چونكى كێشه يا تێدا، كێشه ژى ئه‌وه كو دو گه‌رێن پاران يێن هاتينه دان 21 و 22% بوون، ئه‌وێ ماى ژ 17% يێ پشكا هه‌رێما كوردستانێ زێده‌تره”.
رۆهنكر ژى” ل ده‌مێ خوه، ئێك ته‌نێ گه‌نمى ب نێزيكى 560 هزار ديناران هاتبوو وه‌رگرتن، حوكمه‌تا عيراقێ ل به‌ره نوكه بهايێ وى بگوهۆريت وبكه‌ت ب 300 هزار ديناران: گۆت ژى” مه پرسيارا وێ چه‌ندێ كر كو ب چ قانوونه‌كێ پشتى سێ سالان ژوه‌رگرتنا گه‌نمى، بهايێ وى بهێته ب نيڤى كرن، ل ده‌مه‌كى گه‌نمێ هه‌موو عيراقێ ب 560 هزار ديناران هاتيه وه‌رگرتن”.
بۆ چاره‌سه‌ركرنا ڤێ كێشێ، ئه‌شواق جاف داخواز ژ سه‌رۆك كۆمارا عيراقێ وهه‌ردو وه‌زيرێن كورد ل جڤاتا وه‌زيرێن عيراقێ و65 په‌رله‌مانتارێن كورد يێن جڤاتا نوونه‌رين عيراقێ دكه‌ت، فشارێ ل سه‌ر عه‌بادى بكه‌ن دا مافێ جوتيارێن هه‌رێما كوردستانێ نه‌هێته خوارن.
