عه‌بادى و پارێزگه‌رێ به‌سره ل په‌رله‌مانى عيراقێ شه‌ره ده‌ڤێ دكه‌ن
ئه‌ڤرۆنيوز:
دكۆمبوونا ئه‌ڤرۆ يا نه‌ئاسايى يا په‌رله‌مانێ عيراقێ كو ل دووڤ داخوازا موقته‌دا سه‌در هاتيه ئه‌نجامدان ل دۆر كێشێن به‌سرا، سه‌رۆك وه‌زيرێن عيراقێ وپارێزگه‌رێ به‌سرا شه‌ره‌ده‌ڤێ دكه‌ن.
حه‌يده‌ر عه‌بادى، سه‌رۆك وه‌زيرێن عيراقێ پشتى په‌يڤه‌ك خواندى ل دۆر كێشێن به‌سرا وتيما وه‌زارى يا وى ژى راپۆرتێن خوه خواندين، پارێزگه‌رێ به‌سرا (ئه‌سعه‌د عيدانى) دكۆمبوونێ دا گۆت ” ده‌مێ من گوهێ خوه دايه ئاخڤتنين سه‌رۆك وه‌زيران ووه‌زيرێن وى، من هه‌ست كر كو چو ئاريشه ل به‌سرا نينن وخه‌لكێ به‌سرا يێ خه‌مساره”.
عه‌بادى دبه‌رسڤا پارێزگه‌رێ به‌سرا دا ب ده‌نگه‌گێ بلد گۆت” تو وه‌كو پارێزگار وجڤاتا پارێزگه‌هێ دخه‌مسارن ژبه‌ر كێشێن به‌سرا”. پارێزگه‌رێ به‌سرا ژى به‌رسڤا عه‌بادى دده‌ت ودبێژيتێ ” كا خه‌مساريا من بێژه ئه‌وا من كرى، هه‌ر پرۆژه‌كێ هه‌بيت نه تنێ ب ناڤى يه به‌لكو ب مه‌زاختنا پارايه وهه‌وه چو بۆ به‌سرا نه مه‌زاختيه، كا پارێن 5% يێ پترۆدۆلارى كو ئه‌ڤه ژ سالا 2007 بۆ به‌سرا نه‌هاتين، كا پارێن ده‌رگه‌هێن سنورى ل به‌سرا كو چو بۆ به‌سرا ژێ نه‌هاتيه مه‌زاختن؟”.
عه‌بادى جاره‌كا دى ب ده‌نگه‌گێ بلند گۆته پارێزگه‌رێ به‌سرا” تو بۆچى نوكه ل به‌سرا نينى، جهێ ته ل ڤێرێ نينه، پێدڤى بوو تو نوكه ل به‌سرا باى”.. پارێزگه‌رێ به‌سرا به‌رسڤا وى دده‌ت ودبێژيت” ل دووڤ داخوازيه‌كا سه‌ركرده‌كێ عيراقى ئه‌وژى موقته‌دا سه‌در هاتم نه‌جه‌ف بۆ كۆمبوونه‌كێ وهه‌كه موقته‌دا سه‌در داخوازێ ژته ژى بكه‌ت تو دێ ب له‌ز چيه نه‌جه‌ف”.
