عه‌بادى ژ حزبا ده‌عوه دێ جودابيت
ئه‌ڤرۆنيوز:
رۆژنامه‌كا له‌نده‌نى به‌لاڤكر كو سه‌رۆك وه‌زيرێن عيراقێ حه‌يده‌ر عه‌بادى ل ڤان نێزيكان دێ بريارا جودابوونێ ژ حزبا ده‌عوه يا ئيسلامى كو نورى مالكى سه‌رۆكاتيا وێ دكه‌ت ده‌ت.
رۆژناما (الحياه) يا له‌نده‌نى ژزار ده‌ڤێ چه‌ندين ژێده‌ران ل به‌غدا به‌لاڤكر” مه‌رجه‌عێ شيعان ل نه‌جه‌ف ورێبه‌رێ ره‌وتێ سه‌درى، هه‌مان بۆچوون يا هه‌ى به‌رامبه‌ر به‌ربژارێ سه‌رۆك وه‌زيران هه‌كه ژ حزبا ده‌عوه بيت، پێدڤيه سه‌ربخوه بيت وژده‌رڤه‌ێ راسپاردێن حزبێ بيت”.
ئاماژه ب وێ چه‌ندێ ى كر كو حه‌يده‌ر عه‌بادى ل دۆر وێ بۆچوونێ يێ هاتيه ئاگه‌داركرن، به‌لێ هه‌تا نوكه بريار نه‌دايه، به‌لێ يێ ژبرياردانێ نێزيك بووى وچاڤه‌رێ شێوازێ ره‌فتاركرنێ يه ل گه‌ل پێشهاتێن حزبا خوه.
ئاشكراكر ژى، دناڤ حزبا ده‌عوه دا ناكۆكى يا هه‌ى ل سه‌ر هه‌ڤپه‌يمانيكرنێ ل گه‌ل ليستا سائيرون ب سه‌رۆكاتيا موقته‌دا سه‌در.
خوياكر ژى، ميحوه‌رێ نورى مالكى دناڤ حزبا ده‌عوه دا ب تمامى ره‌ت دكه‌ن ليستا نه‌سر ب سه‌رۆكاتيا عه‌بادى هه‌ڤپه‌يمانيێ ل گه‌ل ليستا سائيرون بكه‌ت، ئه‌گه‌رێ وێ چه‌ندێ ژي بۆ هه‌لويستێ سه‌در به‌رامبه‌ر مالكى دزڤرينن.