عه‌بادی : داخوازیێن هه‌لوه‌شاندنا ئه‌نجامێن هەلبژارتنێن پەرلەمانی نه دروستن
ئەڤرۆ نیوز ، زنار تۆڤی :
سه‌رۆك وه‌زیرێن عێراقێ داخوازا هه‌لوه‌شاندنا ئه‌نجامێن هه‌لبژارتنێن پەرلەمانێ عێراقێ ب كاره‌كێ نه‌دروست وه‌سفكرن و هه‌ڤده‌م حێبه‌تی بوونا خوه ژ داخویانیێن ل دۆر شه‌رێ ناڤخوه ژی دانە دیارکرن.
حه‌یده‌ر عه‌بادی سه‌رۆك وه‌زیرێن عێراقێ د پرێسكۆنفرانسێ خوه یێ حه‌فتیانه دا راگه‌هاند : کو داخوازێن هه‌لوه‌شاندنا ئه‌نجامێن هه‌لبژارتنێن پەرلەمانی كاره‌كێ نەیێ دروسته.
هەروەسا گۆت ژی : ئه‌و حێبه‌تی بوویه ژ داخویانیێن به‌رپرسه‌كێ كۆمسیۆنێ لدۆر دروستبوونا شه‌ره‌كێ ناڤخوه هەکە هاتوو ئه‌نجامێن هه‌لبژارتنان هاتنە هه‌لوه‌شاندن.
جهێ ئاماژه پێكرنێ یه كو ریاز به‌دران، سه‌رۆكێ بازنه‌یا هه‌لبژارتنان د كۆمسیۆنێ دا هوشداری ژ هه‌لوه‌شاندنا ئه‌نجامێن هه‌لبژارتنان دابوو ،هەروەسا گۆتبوو هەکە گوهۆرین د ئه‌نجامێن هەلبژارتنان دا بهێتە کرن دێ بیته ئەگەرێ شه‌ره‌كێ ناڤخوه‌یی.
داخویانیا وی به‌رپرسی کومسیۆنێ د ده‌مه‌كی دا هاتیه کو پەرلەمانێ عێراقێ دوهـی د روونشتنا خوه دا كۆمسیۆن پێگیركربوو ب هژمارتنا ب ده‌ست یا 10% یا سندۆقێن ده‌نگدانێ و زێده‌باری هه‌لوه‌شاندنا ده‌نگێن ده‌رڤه و یێن ئاواره‌یان.
