عه‌بادی ڤێ جارێ پێشمه‌رگه ژبیرنه‌كرن
ئه‌ڤرۆ نیوز:
حه‌یده‌ر عه‌بادی، سه‌رۆكوه‌زیرێن ئیراقێ د كۆنفرانسێ میۆنشن دا ل ئه‌لمانیا راگه‌هاند: بۆ ئێكه‌م جاره هێزێن پێشمه‌رگه‌ی ملبملێ سوپایێ ئیراقێ شه‌ری دكه‌ت و پشته‌ڤانییا سوپای د شه‌رێ دژی داعشێ دا دكه‌ت.
عه‌بادی گۆت: مه پێنگاڤێن گرنگ د ئێكخستنا خه‌لكێ ئیراقێ دا هاڤێتینه و نها خه‌لكێ ئیراقێ پتری هه‌رده‌مه‌كێ دی د ئێكگرتی نه، بۆ ئێكه‌م جار برایێن مه ژ هێزێن پێشمه‌رگه‌ی ملبملێ سوپايێ ئیراقێ شه‌ر كر، د دیرۆكێ دا هه‌ردو ئالییان شه‌ر دژی هه‌ڤدو دكر و رژێما ژناڤچوویی هێزا سه‌ربازی ل دژی كورد و توركمان و شه‌به‌كان بكاردئینا.
ناڤهاتی خویا كر كو هێشتا هاریكاریێن دارایی بۆ رێكخستنا تیرۆرستی یا داعشێ دچن و بۆ رێگرتن ل وێ یه‌كێ لهه‌ڤگوهرینا هه‌والگیری یا پێتڤییه و ئیراق بۆ پارڤه‌كرنا زانیاریان ئاماده‌یه.
سه‌رۆكوه‌زیرێن ئیراقێ د چه‌ندین كۆنفرانس و گۆپیتكێن سالێن بۆری دا ژ وان ژی د گۆتارا خوه یا نه‌ته‌وه‌یێن ئێكگرتی دا په‌سنا حه‌شدا شه‌عبی و هێزێن ئیراقی كربوو لێ ب چ ره‌نگه‌گی به‌حسێ هێزێن پێشمه‌رگه‌ی نه‌كربوو.
