عه‌بدولمه‌هدى ناڤێن به‌ربژارێن وه‌زاره‌تێن داد و په‌روه‌رده ره‌وانه‌ى جڤاتا نوونه‌ران كرن
ئه‌ڤرۆ نيوز:
عادل عه‌بدولمه‌هدى، سه‌رۆك وه‌زيرێن عيراقێ ناڤێ دو به‌ربژاران بۆ هه‌ر ئێك ژ وه‌زاره‌تێن داد و په‌روه‌رده بۆ جڤاتا نوونه‌رێن عيراقێ ره‌وانه‌كرن.
سكرتێرا گشتى يا جڤاتا نوونه‌رێن عيراقێ، خه‌ديجا عه‌لى بۆ رۆژناما سه‌باح يا فه‌رمى يا عيراقى راگه‌هاند كو سه‌رۆك وه‌زيرێن عيراقێ، عادل عه‌بدولمه‌هدى ناڤێ سه‌فانا تايى ژ سونيان بۆ پۆستێ وه‌زيرا په‌روه‌ردێ و دادوه‌ر ئه‌كره‌م قادر ژ پشكا كوردان بۆ وه‌زاره‌تا داد ره‌وانه‌ى جڤاتا نوونه‌ران كرينه.
خه‌ديجايێ ئاماژه ب وێ چه‌ندێ ژى كريه كو د چه‌ند رۆژێن داهاتى دا، جڤاتا نوونه‌ران دێ ده‌نگى ل سه‌ر به‌ربژارێن سه‌رۆك وه‌زيران ده‌ت.
پێشتر ژ به‌ر كو برايێ وێ د ناڤ داعش دابوويه، وه‌زيرا په‌روه‌ردێ شه‌يما هيالى ده‌ست ژ پۆستێ وه‌زيران په‌روه‌ردێ به‌ردا.
كابينا عه‌بدولمه‌هدى، ژ 22 وه‌زاره‌تان پێك هاتيه و هێشتا وه‌زاره‌تێن داد، په‌روه‌رده، ناڤخۆ و به‌ره‌ڤانى دبێ وه‌زيرن و سه‌رۆك وه‌زير هه‌ر ئێك ژ پۆستێن وه‌زاره‌تا ناڤخۆ و به‌ره‌ڤانيێ ب وه‌كاله‌ت ب رێڤه دبه‌ت.
