عه‌ره‌فات كه‌ره‌م: پارتی و سه‌دری و سوننه ل هه‌ولێرێ دێ كۆمبوونه‌كا گرنگ ئه‌نجامده‌ن
ئه‌ڤرۆ:
به‌رپرسێ دۆسێیا ئیراقێ ل باره‌گایێ بارزانی راگه‌هاند، د په‌یوه‌ندیا ته‌له‌فۆنی یا ڤێ دووماهیێ دا د ناڤبه‌را سه‌رۆك بارزانی و موقته‌دا سه‌در، رێككه‌فتن ل سه‌ر پێدڤیا وێ چه‌ندێ كو ل رۆژێن داهاتی ئالیێن دناڤ هه‌ڤپه‌یمانیا سێقۆلی ل هه‌ولێرێ كۆمببن.
پشتی په‌یوه‌ندیا ته‌له‌فۆنی یا رۆژا پێنجشه‌مبیا بۆری د ناڤبه‌را سه‌رۆك بارزانی و موقته‌دا سه‌در كو تێدا هه‌دروئالی د هه‌ڤرا بوون ل سه‌ر ئه‌نجامدانا كۆمبوونا سێقۆلی، عه‌ره‌فات كه‌ره‌م، به‌رپرسێ دۆسێیا ئیراقێ ل باره‌گایێ بارزانی د تویته‌كێ دا گۆت” هه‌ردوئالی ل سه‌ر پێدڤیا ئه‌نجامدانا كۆمبوونه‌كا ئالیێن هه‌ڤپه‌یمانیا سێقۆلی ل رۆژێن داهاتی رێككه‌فتن”.
ب گۆره‌ی به‌یاننامه‌كا باره‌گایێ بارزانی، ل رۆژا پێنجشه‌مبیا بۆری سه‌رۆك بارزانی په‌یوه‌ندیه‌كا ته‌له‌فۆنی ل گه‌ل موقته‌دا سه‌در، رێبه‌رێ ره‌وتێ سه‌دری ئه‌نجامدا و تێدا وه‌رگرتنا گاڤێن پێدڤی یێن هه‌ڤپه‌یمانیا سێقۆلی بۆ قۆناغا ئه‌ڤرۆ بۆ گه‌هشتن ب قۆناغا پێكئینانا حوكمه‌تا زۆرینه‌یا نیشتمانی و گرنگیا ئه‌نجامدانا كۆمبوونه‌كێ بۆ ئالیێن دناڤ هه‌ڤپه‌یمانیا سێقۆلی دا ل چه‌ند رۆژێن داهاتی هاته به‌حسكرن.
