عه‌لی عه‌ونی:ده‌ستپێشخه‌ریا سه‌رۆكێ هه‌رێمێ دێ بیته ئه‌گه‌ر كورد ل ئیراقێ ببنه ئالیه‌كێ ب هێز و كاریگه‌ر
ئه‌ڤرۆ:
ئه‌ندامه‌كێ جڤاتا سه‌ركردایه‌تیا پارتی دیموكراتی كوردستان، راگه‌هاند، پێدڤیه ئه‌و ده‌ستپێشخه‌ریا سه‌رۆكێ هه‌رێما كوردستانێ كری، ئالیێن سیاسی ژ ده‌ست خوه نه‌ده‌ن، چونكه ئه‌و ده‌ستپێشخه‌ریه د خێرا ملله‌تێ كورد و ئالیان و هه‌رێما كوردستانێ ب گشتی دایه و دێ بیته ئه‌گه‌رێ وێ چه‌ندێ كورد ل ئیراقێ ببیته ئالیه‌كێ ب هێز و كاریگه‌ر.
عه‌لی عه‌ونی، ئه‌ندامێ جڤاتا سه‌ركردایه‌تیا پارتی دیموكراتی كوردستان، گۆت” ئه‌و دانوستاندنێن بۆ ئێكرێزیا ناڤمالا كوردی ده‌ست پێكرین گه‌له‌ك دگرنگن، چونكه مه چ رێیێن دی نینن و هه‌كه ئه‌م د ئێكگرتی نه‌بین، دێ به‌غدا مفای ژ وێ چه‌ندێ وه‌رگریت و فشاران ئێخیته سه‌رمه بۆ وێ چه‌ندێ موسته‌حه‌قاتێن مه ببریت و وان مادێن دستووری ژی پێشێل بكه‌ت كو په‌یوه‌ندی ب مافێن هه‌رێما كوردستانێ ڤه هه‌ین”.
گۆت ژی” ئه‌و ده‌ستپێشخه‌ریا سه‌رۆكێ هه‌رێما كوردستانێ ڤه‌كرنا ده‌رگه‌هه‌كی یه بۆ وێ چه‌ندێ حزب و ئالیێن سیاسی وێ ده‌لیڤه ژ ده‌ست نه‌ده‌ن، چونكه ئه‌و كارێ سه‌رۆكێ هه‌رێمێ ئه‌نجامدای، د خێرا ملله‌تی و ئالیان و هه‌رێما كوردستانێ ب گشتی دایه”.
ناڤبری رۆهنكر ژی” هه‌كه ئه‌م ئێك ده‌ست بین، ل به‌غدا دێ بینه هێزه‌كا كاریگه‌ر كو فشارێ بكه‌ین بۆ بده‌ستڤه‌ئینانا مافێن كوردان ب گشتی، ب شێوه‌كی وه‌سا كو رێگریێ ل حوكمه‌تا ئیراقێ بكه‌ت مافێن هه‌رێما كوردستانێ پێشێل بكه‌ت”.
