عيراقێ رێ نه‌دا هه‌رێم پشكدارى كۆنگرێ پاريس بيت و هه‌رێمێ ژى نه‌رازيبوونا خوه نيشان دا
ئه‌ڤرۆ نيوز:
بڕيار بوو ئه‌ڤرۆ رۆژا سێشه‌مبى كۆنگرێ پاريس بۆ پتر ژ 20 وه‌لاتێن هه‌ڤپه‌يمان د شه‌رێ دژى داعش دا بهێته ئه‌نجام دان و سه‌ره‌رايى وێ چه‌ندێ كو داخواز هاتبوو كرن هه‌موو لايه‌نێن عيراقێ يێن شه‌رێ داعش دكه‌ن ئاماده بن، به‌لێ عيراقێ رێ ب هه‌رێما كوردستانێ نه‌دايه و ژ به‌ر ڤێ چه‌ندێ ژى فه‌رمانگه‌ها په‌يوه‌نديێن ده‌رڤه يا حوكمه‌تا هه‌رێما كوردستانێ راگه‌هاندنه‌ك به‌لاڤكر و نه‌رازيبوون و نه‌ئاراميا خوه نيشان دا.
ئه‌ڤا ل خوارێ ژى ده‌قێ وێ يه:
ب مه‌ره‌ما هه‌لسه‌نگاندنا ته‌ڤگه‌را بزاڤ و هێرشێن هه‌ڤپه‌يمانان بۆ لێدان و لاوازكرنا گرۆپێ تيرۆرستێن داعش ل سوريا و عيراقێ و گه‌نگه‌شه‌كرنا دووماهى پێشهاتێن ئه‌منى يێن عيراق و ده‌ڤه‌رێ، رۆژا سێشه‌مبى رێكه‌فتى 2ى خزيرانا 2015ێ نێزيكى 20 وه‌لاتێن ئه‌ندام د هه‌ڤپه‌يمانيا نێڤده‌وله‌تى دا دژى داعش ل پاريس يا پايته‌ختێ فره‌نسا كۆنگره‌كێ نێڤده‌وله‌تى گرێدده‌ن.
كۆنگرێ پاريس يێ تايبه‌ت ب وان وه‌لاتێن ل گه‌ل داعش د شه‌رى دا، دياره هه‌رێما كوردستانێ د ڤى روويى دا پشكا شێرى ب به‌ركه‌فتيه كو هێزا ئێكانه‌يه شيايه ب قاره‌مانيه‌تا هێزێن پێشمه‌رگه‌يى مه‌زنترين سه‌ركه‌فتن ل سه‌ر تيرۆرستان بينيت و تووشى شكه‌ستنێن مه‌زن بكه‌ت و ده‌ڤه‌رێ ژێ پاقژ بكه‌ت.
پشتى كۆنگرێ بۆرى، چاڤه‌رێ وێ چه‌ندێ بووين حوكمه‌تا عيراقا فيدرال و كۆمه‌لگه‌ها نێڤده‌وله‌تى رێزێ ل قوربانيدانا گه‌له‌كێ كوردستانێ و قاره‌مانه‌تيا پێشمه‌رگه‌يى بگريت و ب رێز ڤه ته‌ماشه‌يى بزاڤێن هه‌رێمێ بكه‌ت بۆ بنه‌جهكرنا مليۆن و نيڤ ئاواره و په‌نابه‌ران. به‌لێ ڤێ جارێ ژى حوكمه‌تا عيراقێ داخوازا نوونه‌رێ هه‌رێما كوردستانێ بۆ ڤى كۆنگره‌يى نه‌كر و ب تنێ پشكدارى كۆنگرێ پاريس بوو. ب مخابنى ڤه، پشتى بزاڤێن مه ل گه‌ل وه‌زاره‌تا ده‌رڤه يا فيدرال و نڤيسينگه‌ها به‌رێز سه‌رۆك وه‌زيرێن عيراقا فيدرال ئه‌ڤ بابه‌ته ئێكلا نه‌بوويه، ئه‌ڤه د ده‌مه‌كى دايه كو هێزا ژ هه‌موويان پتر كارتێكرن ب ره‌نگه‌كێ ئێكسه‌ر و ب كريار كريه سه‌ر روو ب رووبوونا تيرۆرستێن داعش هێزێن پێشمه‌رگێ كوردستانێ بووينه.
ئه‌م نه رحه‌تيا و نه‌رازيبوونا خوه و خه‌لكێ كوردستانێ ئاراسته‌يى حوكمه‌تا عيراقا فيدرال دكه‌ين و كو ئێكلايانه پشكدارى ڤى كۆنگره‌يى كريه و گوهـ ب داخوازناما هه‌ڤپه‌يمانيا نێڤده‌وله‌تى نه‌دايه كو دخوازن ل سه‌ر ئاستێ عيراقێ هه‌موو پشكدار بن، هه‌رێما كوردستانێ وه‌كو هه‌رێما ئێكانه ل عيراقا فيدرال ب مافێ خوه دزانيت پشكدارى ڤان ره‌نگه كۆمبوونان بيت و نوونه‌رێ خوه هه‌بيت و ده‌ربڕينێ ژ هه‌لويست و سياسه‌تا هه‌رێما كوردستانێ بكه‌ت و ئه‌ڤه ژى مافه‌كێ دستوورى يه و مادێ 105 ژ دستوورێ هه‌رده‌مێ عيراقێ ئاماژێ ب هه‌ڤسه‌نگيا نوونه‌راتيكرنێ د ناڤه‌ندێن نێڤده‌وله‌تى دا دكه‌ت.
