ڤێ حه‌فتيێ مه‌سرور بارزانى و لژنا ناڤخۆ و ئه‌منى ل په‌رله‌مانى دێ روونن
ئه‌ڤرۆ نيوز، نيوار محه‌مه‌د سه‌ليم:
بڕياره حه‌فتيا بهێت، ژ بوو دانوستاندنێ ل سه‌ر كاودانێن ئه‌منى يێن هه‌ولێر و كوردستانێ، مه‌سرور بارزانى، شيره‌تكارێ جڤاتا ئاسايشا هه‌رێما كوردستانێ ل باره‌گايێ جڤاتێ پێشوازيێ ل ئه‌ندامێن لژنا ئه‌من و ئاسايشا په‌رله‌مانێ كوردستانێ بكه‌ت.
نازم كه‌بير هه‌ركى، جێگرێ لژنا ناڤخۆ و ئاسايشێ ل په‌رله‌مانێ كوردستانێ د داخۆيانيه‌كێ دا بۆ ئه‌ڤرۆ نيوز راگه‌هاند كو لژنا ئه‌من و ئاسايشا په‌رله‌مانێ كوردستانێ ب هه‌ماهه‌نگى ل گه‌ل جڤاتا ئاسايشا هه‌رێما كوردستانێ دێ ل باره‌گايێ جڤاتێ ل گه‌ل ئێك روونن دا كو گه‌نگه‌شێ ل سه‌ر نووترين پێشهاتێن ئه‌منى بكه‌ن.
ئاماژه ب وێ چه‌ندێ ژى كر كو وه‌كو لژنا ئه‌منى و ئاسايشێ به‌رده‌وام ل گه‌ل لايه‌نێن ئه‌منى د روونن و وه‌كو به‌رنامه ژى هه‌يڤانه ل گه‌ل وه‌زيرێ ناڤخۆ يێ حوكمه‌تا هه‌رێما كوردستانێ ژى د روونن بۆ زانينا نووترين پێشهاتێن ئه‌منى و هه‌ڤكاريكرنا هه‌ڤدۆ.
نازم كه‌بير هه‌ركى گۆتژى: “هه‌ر د ڤێ روونشتنێ دا، دێ دانوستاندن گوهۆڕينا بۆچوونا ل سه‌ر وان پرۆژه قانوونان هێته كرن يێن گرێدايى وى ده‌زگه‌هى وه‌كو پرۆژێ خانه‌نشينكرنا هێزێن ناڤخۆ و ده‌زگه‌هێن ئاسايشێ”.
ل دووماهيا هه‌يڤا بۆرى ژ ئه‌نجامێ په‌قينا ترۆمبێله‌كا مينرێژكرى، ل هه‌ولێر پێنج كه‌س شه‌هيد بوون و نێزيكى 25 كه‌سان ژى بريندار بوون.