عيراق وئێكسۆن موبێل نه‌گه‌هشتنه رێكه‌فتنێ
ئه‌ڤرۆنيوز:
وه‌زيرێ په‌ترۆلا عيراقێ ئاشكراكر، عيراق ل گه‌ل كۆمپانيا ئێكسۆن موبێل نه‌گه‌هشته رێككه‌فتنێ ل سه‌ر پرۆژێ زێده‌كرنا به‌رهه‌مئينانێ ل چه‌ند يرێن په‌ترۆلى ل باشوورێ عيراقێ.
جه‌بار لعێبى، وه‌زيرێ په‌ترۆلا عيراقێ ئه‌ڤرۆ دوشه‌مبى 25/12/2017 دكۆنگره‌كێ رۆژنامه‌ڤانيدا ئاشكراكر” هێشتا عيراق ل گه‌ل كۆمپانيا ئێكسۆن موبێل نه‌گه‌هشته رێككه‌فتنێ ل سه‌ر پرۆژێ زێده‌كرنا به‌رهه‌مئينانێ ل چه‌ند بيرێن په‌ترۆلى ل باشوورێ عيراقێ”.
لعێبى گۆت ژى” هه‌كه هه‌تا هه‌يڤا شوباتا 2018 رێككه‌فتن نه‌هێته ئه‌نجامدان، دێ ئه‌و پرۆژه بۆ كۆمپانيه‌كا دى هێته دان”.
وه‌زيرێ په‌ترۆلا عيراقى ل هه‌يڤا چريا ئێكێ يا بۆرى راگه‌هاندبوو، عيراق ل گه‌ل كۆمپانيا ئێكسۆن موبێل يا دقۆناغا دووماهيێ ژ دانوستاندنێ بۆ پێشڤه‌برنا وى پرۆژه‌ى كو پێكدهيت ژ دروستكرنا بۆريا په‌ترۆلێ وعه‌مبار وزێده‌كرنا به‌رهه‌مئينانێ ل چه‌ند بيرێن په‌ترۆلى ل باشوورێ عيراقێ”.
ئێكسۆن موبێل ئێكه ژ مه‌زنترين كۆمپانيێن دبوارێ په‌ترۆلێ وغازێ دا ل سه‌ر ئاستێ جيهانێ وبنگه‌هێ وێ يێ سه‌ره‌كى يێ ل ته‌كساس ل ئه‌مريكا و82 هزار كارمه‌ند ل سه‌رانسه‌رى جيهانێ يێن هه‌ين. ل سالا 2015 داهاتێ وێ كۆمپانيێ زێده‌تر ژ 268 مليار دۆلاران بوو.
