عيراق ژبن سزايێن به‌ندێ حه‌فت يێن نێڤده‌وله‌تى ده‌ركه‌ڤت
ئه‌ڤرۆنيوز:
وه‌زاره‌تا ده‌رڤه‌يا عيراقێ، ئه‌ڤرۆ شه‌مبيێ 9/12/2017، دمالپه‌رێ خوه‌يێ فه‌رمى دا ل سه‌ر تۆرا ئه‌نترنێتێێ، ب دووماهى هاتنا پێگيريێن عيراقێ ب برگا گاز به‌رمبه‌ر خوارنێ دچارچۆڤێ به‌ندێ حه‌فتێ يێ نه‌ته‌وين ئێكگرتى دا، راگه‌هاند.
پشتى رژێما سه‌دامى ل 2/8/1990 وه‌لاتێ كوێتێ داگيركرى، جڤاتا ئاسايشا نێڤده‌وله‌تى عيراق خسته دبه‌ندێ حه‌فتێ يێ جارناما نه‌ته‌وێن ئێكگرتى دا كو سه‌پاندنا سزايان وهژمارتنا عيراقێ ب ژێده‌رێ گه‌فان دهژمێريت.
بۆ ده‌مێ چه‌ندين سالان ژى، كوێتێ نه‌رازيبوونا خوه ل سه‌ر راكرنا عيراقێ ژبه‌ندێ حه‌فتێ دياردكر ژبه‌ر ناكۆكيێن نه‌هاتينه چاره‌سه‌ركرن ل دۆر سنورى وبه‌رزه‌بوويان ومولكان وچه‌ند پرسێن دى.
وه‌زاره‌تا ده‌رڤه‌يا عيراقى دمالپه‌رێ خوه‌دا، ده‌قێ بريارا جڤاتا ئاسايشا نێڤده‌وله‌تى به‌لاڤكريه كو تێدا دبێژيت” عيراقێ ونه‌ته‌وێن ئێكگرتى ئه‌و پێرابوونێن سه‌پاندى ب گۆره‌ى به‌ندێ حه‌فتێ ل دووڤ بريارا 1985 ل سالا 2010 وبريارا 2335 ل سالا 2016، يێن بجهئيناين”.
وه‌زاره‌تا ده‌رڤه‌يا عيراقێ ژ جڤاتا ئاسايشا نێڤده‌وله‌تى ڤه‌گۆهاست ژى كو ” ئه‌ڤ برياره پێنگاڤه‌كا گرنگه كو عيراق بشێت بزڤريت بۆ ره‌وشا وى يا ئاسايى وپێگه‌هێ وێ يێ نێڤده‌وله‌تى ودووپاتكرنه‌كه ل سه‌ر ب دووماهي هاتنا پێگيريێن عيراقێ ل دووڤ به‌ندێ حه‌فتێ يێ تايبه‌ت ب به‌رنامێ گاز به‌رامبه‌ر خوارنێ، پشتى ب شێوه‌كێ تمام هاتينه بجهئينان”.
