عیراقێ ئاگەهـ ژ پلانا رزگارکرنا باشیکێ نینە
ئەڤرۆ نیوز:
سەرۆکێ جڤاتا ناحیا باشیکێ بۆ رۆژناما ئەڤرۆ دیار کر کو حوکمەتا عیراقێ چ پێنگاڤ بۆ رزگارکرنا ناحیا باشیکێ و بەحزانێ نەھاڤیتینە، چو پێزانین ژی نەگەھشتینە مە کو حوکمەتا عیراقێ تشتەکێ بچووک ژی بۆ باشیک و بەحزانێ دێ کەت و گۆت: “حوکمەتا عیراقێ دبنیات دا نوزانت ناحیەک بناڤی باشیک و بەحزانێ سەر ب عیراقێ ڤە یا ھەی”.
داسن قەوال سلێمان، سەرۆکێ جڤاتا ناحیا باشیکێ ئاشکرا کر، ناحیا باشیک و بەحزانێ ل سەر دەستێ پێشمەرگێ قەرەمان دێ ھێتە رزگارکرن و گۆت: “ئەم چاڤەرینە ژ لایێ سەرۆک بارزانی ڤە ژڤانێ رزگارکرنا ناحیا باشیک و بەحزانێ بھێتە دیارکرن، ئەم پشتراستین د دەمەکێ نێزیک دا دێ ھێتە کۆنترولکرن”.
ناڤبری ئاماژە ب وێ چەندێ ژی کر، ئەو دخوازن باشیک و بەحزان نەمینیتە سەر ب حوکمەتا عیراقێ ڤە و گۆت: “ئەم حەز دکەین د دەمەکێ نێزیک دا ریفراندۆم بھێتە ئەنجامدان و خەلکێ باشیک و بەحزانێ ب خوە بڕیارێ ل سەر چارەنڤیسێ خوە بدەن، چونکو ئەڤە دو سالان باشیک و بەحزانێ د دەستێ تیرۆرستێن داعشێ دا و ھێشتا عیراقێ ئاگەە ژێ نینە و رۆژەکێ ژی بەحس ل رزگارکرنا دەڤەرا باشیک و بەحزانێ ژ لایێ بەرپرسین عیراقێ ڤە نەھاتیە کرن”.
