عیراق مه‌یدانا ڤاڤارتنا حسابێن وه‌لاتێن زلهێزین جیهانی یه
ئه‌ڤرۆ نيوز:
هه‌ڤڕكیا رووسی و ئه‌مریكی ل مه‌یدانا سیاسی رۆژهه‌لاتا ناڤین ب پێڤاژویه‌كا مه‌ترسیدار ده‌ستپێكریه و هوشداریا شه‌ره‌كێ به‌رفره‌ه ل ده‌ڤه‌رێ ب تایبه‌تی ل عیراقێ دده‌ت.
پشتی رووسیا هاتیه دناڤ هێلانا به‌رهنگاریا شه‌رێ دژی داعش، ب رێیا پشته‌ڤانیكرنا میلیشیاتێن هه‌ڤكار ل گه‌ل وه‌لاتێ ئیرانێ و چه‌ك بۆ وانا هاتینه راده‌ستكرن، هه‌ڤده‌م ئه‌مریكا ژی چه‌ك دابوو ده‌ستێن هۆزێن عه‌ربێن سونی بۆ به‌رهنگاریا ل پارێزگه‌ها ئه‌نبار.
هه‌ڤده‌م وان كارێن سیاسی چاڤدێرێن سیاسی ژی هوشداری سه‌باره‌ت ڤه‌كرنا مه‌یدانا هه‌ڤڕكیا سیاسی دناڤبه‌را رووسیا و هه‌ڤالبه‌ندێن وێ چوار قولی یێن نوو و ئه‌مریكا ل عیراقێ كرن، كو دوبه‌ره‌كیا دناڤبه‌را سونی و شیعان ژ ئالیه‌كی و شیعان و كوردان ژ ئالیه‌كێ دیتر ڤه بهێته بكارئینان بۆ شه‌ڕێ دناڤبه‌را هه‌ردو زلهێزێن جیهانێ ل عیراقێ.
هه‌ر وه‌سا دبێژین، شاراندنا هڤڕكیێن له‌شكری ژ ئالیێ هه‌ردو جه‌مسه‌رێن سیاسی یێن جیهانی ڤه ئه‌مریكا و رووسیا، چ ل رۆژهه‌لتا ناڤین یا ن ژی ل عیراقێ، ب پشته‌ڤانیكرن و راده‌ستكرنا چه‌كی و للوجستی دناڤبه‌را ئالیێن هه‌ڤدژ و دوبه‌ركیێن هزری و باوه‌ریێ كاره‌كێ گه‌له‌ك مه‌ترسیداره، چونكی دێ وه‌لاتێ عیراقێ به‌ر ب نه‌مانێ به‌ت، و شه‌ڕێن تائیفه‌گه‌ری دناڤبه‌را ملله‌تێن عیراقێ په‌یدا كه‌ت، ل گۆر دیتنا چاڤدێرێ سیاسی فارس ئه‌للهێبی.
فارس ئه‌للهێبی هه‌روه‌سا گۆت: ئه‌ڤا نوكه ل عیراقێ دهێته روودان، بلندكرنا ئاستی ریتما شه‌ڕێ له‌شكری یه دناڤبه‌را رووسیا و ئه‌رمیكا دا، دیسا پێشبینیا شه‌ره‌كێ جیهانی یێ سیێ دهێته كرن، كو ئاخا عیراق و شامێ مه‌یدانا وی شه‌ڕی یه، كه‌رستێن وی شه‌ری سونی و شیعه‌نه و سوته‌مه‌نیا وێ سڤیلن.
چاڤدێرێ ناڤبری هه‌روه‌سا دیاركر، رووسیا بزاڤان دكه‌ت ب هه‌ڤپه‌یمانیا خوه‌یا چوار قولی ڤه بزاڤان دكه‌ت، ئارمانجێن خوه‌یێن ئابۆری ل ده‌ڤه‌رێ بجه بینیتن، و حوكمه‌تان نه‌چار بكه‌ت گرێبه‌ستێن كڕینا چه‌كی وێ ل ده‌ڤه‌رێ ئیمزا بكه‌ن، ل هه‌مبه‌ری وێ ئه‌مریكا بزاڤان بۆ په‌یداكرنا وه‌به‌رهێنانێ ل عیراقێ و ب تایبه‌تێ ل پارێزگه‌ها ئه‌نبار په‌یدا بكه‌ت، به‌رامبه‌ری نه‌هێلانا شه‌رێ داعش.
ژئالیه‌كێ دیڤه په‌رله‌مانتاره‌كێ كورد زانا سه‌عید خزر، پێدڤیه ل سه‌ر حوكمه‌تا عیراقێ پێداچوونه‌كێ ل سه‌ر هه‌موو پێنگاڤێن خوه سه‌باره‌ت هه‌ڤپه‌یمانیا چوار قولی یا نوو یا رووسیا و عیراقێ سووریا و ئیرانێ بكه‌ت.
زنار سه‌عید هه‌روه‌سا گۆت: عیراق یا بوویه مه‌یدا باڕڤه‌كرنا سیاسه‌تا رووسیا و ئه‌مریكا و هنده‌ك وه‌لاتێن دیتر، له‌ورا پێدڤیه حوكمه‌ت پێدا چوونا ل حسابێن خوه‌دا بكه‌ت، پێدڤیه حوكمه‌تا عیراقێ نه‌هێلیت ماتێكرنێن ده‌ره‌كی د ناڤخوه‌یا عیراقێ دا بهێنه كرن.
ناڤبری هه‌روه‌سا ئاماژه‌دا، درۆژێن بهێته دا، رێككه‌فتنا سایكس بیكۆ دهێته ژناڤبرن و ده‌ڤه‌ر جاره‌كا دی ل سه‌ر ده‌ستهه‌لاتێن سیاسی دێ هێته پارچه‌كرن، جاره‌كا دیتر نه‌خشه‌كێ سیاسی یێ نوو ل عیراقێ و سووریا و ئیرانێ دێ په‌یدا بیت، هه‌روه‌سا ئاماژه‌دا، هه‌لویستێ ئه‌مریكا ل عیراقێ یێ لاوازه، له‌ورا چو نه‌رازیبوون ل دۆر ماتێكرنا رووسی د شه‌رێ دژی داعشێ نه‌كرن، دیسان ل هه‌مبه‌ری هه‌ڤپه‌یمانیا چوار قولی ژی بێ ده‌نگ بوو.
نوونه‌را هه‌ڤپه‌یمانیا سونی، نورا سالم گۆت: عیراق بتنێ زه‌ره‌رمه‌نده د ماتێكرنا ئه‌مریكی و رووسی دا، چونكی یا بوویه مه‌یدانا سیاسی و له‌شكری یا وه‌لاتێن هه‌رێمی ژی كو دڤێن هه‌بوونا خوه ب پارێزن ل سه‌ر كیستێ سامانێن خوه‌زایی، لوره‌ا ژ حوكمه‌تێ دخوازین هه‌بوونا خوه‌یا ب هێز هه‌بیت و رێ ل هه‌مبه‌ری وان هڤڕكیان جیهانێ دناڤا عیراقێ دا بگریت، و رێزێن هه‌موو پێكهاتێن عیراقێ بكه‌ته ئێك بۆ به‌رسینگكرتنا مه‌ترسیا ئێمناهیی و ئابووری.
نوونه‌را سونی هه‌روه‌سا گۆمانێن خوه ل دۆر پشته‌ڤانیكرنا رووسیا بۆ عیراقێ ده‌رخستن و گۆت: رووسیا بتنێ ل دووڤ ئارمانجا ئابوری و سیاسی و به‌رفره‌هكرنا ده‌ستهه‌لاتێن خوه ل ده‌ڤه‌رێ دگه‌ریت، ب تایبه‌تی ل عیراقێ و سووریا.
