عیراق گەنمی ژ ئەمریکا دکڕیت و جۆتیارێن دھۆکێ گەنمێ خوە ل بازاڕی دفرۆشن
ئەڤرۆ نيوز:
رێڤەبەرێ کۆمپانیا گشتیا دروستکرنا دان و دکاکان ل پارێزگەھا دھۆکێ راگەھاند، ژ بەر نەدانا پارێ گەنمی ژ لایێ حوکمەتا عیراقێ ڤە د سێ سالێن بۆری دا، ئەڤ سالە جۆتیارێن دھۆکێ ب دەلیڤە دیتیە کو گەنمێ خوە راستەوخۆ ب فرۆشن.
نازم محەمەد عەلی، رێڤەبەرێ کۆمپانیا گشتیا دروستکرنا دان و دکاکان ل پارێزگەھا دھۆکێ بۆ ئەڤرۆ دیار کر، ھژمارەکا زۆر یا جۆتیارێن دھۆکێ نھا نەچاربووینە گەنمێ خوە دبەنە پارێزگەھێن عیراقێ و ھندەک جھێن دی و ھەتا ل ناڤ بازاری ژی راستەوخۆ دفرۆشن و ئەڤە ژی ژ بەر ھندێ یە کو عیراق غەدرێ ل جۆتیاران دکەت و گۆت: “ھەتا نوکە پارێ گەنمێ سالا 2014 و 2015 و 2016 یێ جۆتیاران نەھاتیە دان، لەو جۆتیار نەچارنینن خوە ل ھیڤیا حوکمەتا عیراقێ بگرن ھەتا گەنمێ وان ژێ بکڕیت و ھندی بازارێ راستەوخۆ ھەبیت دێ گەنمێ خوە فرۆشن”.
نازم محەمەد عەلی، دیار کر ژی، ژ بەر کو ئەو گەنمێ ل عیراقێ و ھەرێما کوردستانێ دھێتە بەرھەمئینان ل دووڤ وان ساخلەتان نینە ببیتە ئار و نان، لەوما حوکمەتا عیراقێ نەچارە سالانە رێژەکا مەزن یا گەنمی ژ وەلاتێن ئەمریکا، کەنەدا و ئوسترالیا بکریت، ئەڤ گەنمێ ژ دەرڤە دھێت ل گەل گەنمێ عیراقێ دھێتە تێکەلکرن و پاشی دبیتە ئار و ل سەر وەلاتیان دھێتە بەلاڤکرن.
نازم زێدەتر دبێژیت: پشکا جۆتیارێن پارێزگەھا دھۆکێ ژ وەرگرتنا گەنمی 107 ھزار تەنن و ھەتا نوکە ل ھەر سێ سایلۆیێن پارێزگەھا دھۆکێ نێزیکی 34 ھزار تەنان ھاتینە وەرگرتن و ب سەدان ترۆمبێل ژی د سرایێ دانە بۆ ڤالاکرنا گەنمێ خوە.