عەبدولحەکیم خەسرۆ: کورد دێ د حوکمەتا نوویا عیراقێ دا پشکداربن
ئه‌ڤرۆ نيوز:
ھەتا نوکە چەندین کۆمبوون دناڤبەرا لایەنێن عیراقی و کوردی ھاتینە ئەنجامدان ب مەرەما پێک ئینانا حوکمەتا نوویا عیراقێ بسپۆرەکێ زانستێن سیاسی ژی دبێژیت، پارتی و یەکێتی مەرجێ بجە ئینانا داخوازیێن کوردان پشکداری د حوکمەتا نوویا عیراقێ دا بکەن، بسپۆرەکێ زانستێن سیاسی ژی ئاماژە بڤێ چەندێ دکەت، کورد دێ پشکداریێ د حوکمەتا نوویا عیراقێ دا بکەن.
دکتۆر عەبدولحەکیم خەسرۆ، بسپۆرێ زانستێن سیاسی بۆ رۆژناما ئەڤرۆ گۆت” پشتی دەستپێکرنا دانوستانێن زۆر دگەل لایەنێن سیاسیێن عیراقێ بۆ پێک ئینانا مەزنترین کۆتلا پەرلەمانی، بەلێ دیارە پارتی و ئێکەتی نەگەھشتن رێکەفتنێ و پشکداری د چو کۆتلەیەکا پەرلەمانی دا نەکر، لەوڕا ژی ھەردو کۆتلەیێن نوکە ھاتینە پێک ئینان چاڤەڕێی بڕیارا دادگەھا فیدڕال دکەن ھەتا ئێک ژوان ب کۆتلەیا مەزنا پەرلەمانی بھێتە تۆمارکرن، پشتی ناساندنا مەزنترین کۆتلە دێ گەڕەکادیا دانوستانان ھێتە دەستپێکرن بۆ پێک ئینانا کابینا نوویا حوکمەتێ و زۆرینەیا پەرلەمانی دێ حوکمەتێ پێک ئینیت، ھەتا نوکە وەسا دیارە ھەلویستێ ھەردو کۆتلەیێن پەرلەمانێ عیراقێ وەک یەکە ھەمبەر لایەنێن ھەرێما کوردستانێ، وەکی یەک بەرێ خوە ددەن داخوازیێن کوردان و مەرجێ پارتی و ئێکەتیێ ژی ئەڤە پڕۆژێ وان بھێتە قەبوولکرن دوڤدا دێ پشکداربن د حوکمەتا نوودا.
دکتۆر عەبدولحەکیم خەسرۆ دیارکر ” پێکھاتا پەرلەمانێ نووێ یێ عیراقێ دێ زۆرینەیەکا ئیرانی بیت، بدیتنامن کورد دێ پشکداریێ کەت د حوکمەتا نوویا عیراقێ دا، ژبەرکو دێ کۆتلەیا مەزن بزاڤان کەت کوردان بۆ خوە راکێشیت، بەلێ پشتی پێک ئینانا حوکمەتێ دێ بھەمان عەقلیەتا بەرێ عیراق ھێتە رێڤەبرن و چو داخوازیێن کوردان ناھێنە بجە ئینان، ژبەرکو پشتی پڕۆسا ئازادیا عیراقێ ھەتا نوکە سەرەڕای چەندین رێککەفتنێن ھاتینە کرن دناڤبەرا ھەرێما کوردستانێ و بەغدا، بەلێ دەستھەلاتدارێن عیراقێ پێگیری چو رێکەفتن و سۆزێن خوە دگەل ھەرێما کوردستانێ نەبووینە، ئەڤەژی ئاماژەیەکا رۆھنە چوار سالێن بھێن باشترنابن ل سالێن بۆری و کورد دێ وەک خوە مینن د عیراقێ دا، ھەتا ئەف عەقلیەتە عیراقێ رێڤەببەن دێ ئاریشە و ئالۆزی ھەر بەردەوامبن.
