عەبدولسەلام بەرواری: پتریا سـكالایێن دادگـەها فیدرال دژی كوردسـتانێ ژ ئالیێ كـوردان ڤـە هاتینـە تۆمـاركـرن
ئەندامەكێ بەرێ یێ پەرلەمانێ كوردستانێ ڕادگەهینیت: پتریا وان سكالایێن ل دادگەها فیدرالی یا ئیراقی دژی قەوارەیێ هەرێما كوردستانێ هاتینە تۆماركرن، ئالیێن كوردستانی و پشكەك ژ فراكسیۆنێن پشكدار د كابینەیا نەهێ دا تۆمار كرینە.
عەبدولسەلام بەرواری، شرۆڤەكارێ سیاسی و ئەندامێ بەرێ یێ پەرلەمانێ كوردستانێ گوت» ئێك ژ هۆكارێن بووینە ئەگەر هەولێر و بەغدا ل دۆر كێشەیێن هەلاویستی نەگەهنە ڕێككەفتنێ، قبوولنكرنا هزرا فیدرالیەتێ ژ ئالیێ بەرپرسێن ئیراقێ و دانپێدان نەكرن ب وێ چەندێ هەرێما كوردستانێ د فیدرالیەتێ دا یا جودایە ژ پارێزگەهێن دی یێن ئیراقێ».
عەبدولسەلام بەرواری دبێژیت» هەرێما كوردستانێ ب گۆرەی مادەیا 121 ژ دستووری نوونەرایەتیا دەولەتا ئیراقێ دكەت ل سەر پارچەیەكا ئەردی و هەموو دەستهەلات هەنە، بەلێ ئەڤە ژ ئالیێ وەزیر، بەرپرس، سیاسەتمەدار و هەتاكو كارمەندان ژی ڤە ل بەغدا ناهێتە قبوولكرن».
ب دیتنا وی شرۆڤەكارێ سیاسی» پشتی سالا 2003، حوكمەتێن ئێك ل دووڤ ئێك یێن ئیراقێ د سەركەفتی نەبوون و كێشە هەبوون د پێشكێشكرنا سادەترین خزمەتگوزاری بۆ وەلاتیان و بەردەوام خەلك یێ نەڕازی بوو، بەلێ د بەرامبەر دا ل هەرێما كوردستانێ، سەرەرای ئابلۆقەیا ئابۆری، شەڕێ داعشێ، هاتنا سەدان هزار ئاوارە و پەنابەران، بەردەوام پێشكەفتن ب خوەڤە دیتیە، ئەڤە ژی ئێك ژ هۆكارێن دی یە كو بوویە ئەگەر بەغدا بەردەوام ل گەل هەولێرێ نەگەهیتە ڕێككەفتنێ».
دوپاتكر ژی» ژ ڕوویێ پێشكەفتنێ ڤە هەرێما كوردستانێ ل گەل ئیراقێ ناهێتە بەراوردكرن، خزمەتگوزاریێن وەكو كارەب و ئاڤ ل ئیراقێ گەلەك د خرابن، بەلێ د بەرامبەر دا ل هەرێما كوردستانێ گەلەك باشترە».
خویاكر» د دەمێ بۆری دا پتریا ئەو سكالایێن ل دادگەها فیدرالی دژی هەرێما كوردستانێ هاتینە تۆماركرن، د ڕاستی دا ژ ئالیێ ئەرەبێن شوڤینی نەهاتبوونە تۆماركرن، بەلكو ژ ئالیێ كوردان ڤە و ب تایبەتی ژ ئالیێ هندەك فراكسیۆنێن پشكدار د حوكمەتێ دا هاتبوونە پێشكێشكرن. ئەڤ چەندە ژی بەرپرسێن ئیراقی هانددەت د ڕژد بن ل سەر هەلویستێن خوە و بزاڤێ بكەن وەكو پارێزگەهەك مامەلێ ل گەل هەرێمێ بكەن» .
