عەبدوللا گویل دێ پارتەکا نوو دامەزرینیت
ئەڤرۆ نیوز:
ل گۆر راپۆرتەکا مالپەرێ ساریەر تایمز یێ تورکی عەبدوللا گویل سەرۆک کۆمارێ بەرێ یێ تورکیا ل گەل بۆلەنت ئارنج و عەلی باجان بەرھەڤیان بۆ ئاڤاکرنا پارتەکا نوو ل تورکیا دکەن و ل گۆر زانیاریان دێ ناڤێ پارتیا وان ژی “پارتیا نوو” بیت و نھا بەرھەڤی ب دووماھی ھاتنە، گەلەک ژ ھەڤالێن بەرێ یێ ئەردۆگانی کو ژ سیاسەتا ئاکپارتیێ نەرازینە ژی پشتەڤانیێ ل گویل دکەن و پشتی کو پارتی ب فەرمی ھاتە راگەھاندن کو ببنە ئەندامێن وێ پارتیێ.
د بەردەوامیا راپۆرتێ دا ھاتیە دیار کرن کو ھەلویستێ چەند رۆژان بەری نھا یێ ئارنجی ژی کو ب رەنگەکێ توند رەخنە ژ ئەردۆگانی گرتبوون ژی بۆ ھندێ ڤەدگەریت و ئەو وەسا دبینن کو ئەردۆگانی خیانەت ل وان کریە و پشتی پێگەھێ خوە ب ھێز کری ھەموو ھەڤالێن خوە یێن بەری ژ پۆستێن گرنگ دوور خستن دا کو ئەو تنێ ل سەر دەستھەلاتێ بیت.
د دووماھیا راپۆرتێ دا ئەو یەک ژی ھاتیە دیار کرن کو گەلەک ژ ئەندامێن پارتیا کۆماریا گەل و پارتیا بزاڤا نەتەوەپەرست ژی پشتەڤانیا خوە بۆ ئاڤاکرنا پارتەکا وەسا دیار کرینە و ئەو دبێژن بەرھنگاریا نھا ل تورکیا نەشێت دەستھەلاتا ئاکپارتیێ ژناڤ ببەت، لێ ب ئاڤاکرنا پارتەکا وەسا کو گویل سەرۆکاتیا وێ بکەت ئەو دێ بشێن گوھۆرینێن مەزن ل تورکیا دروست بکەن. چونکو ئێک ژ ئارمانجێن سەرەکی یێن گویل و ھەڤالێن وی ئەوە کو نەھێلن ئەردۆگان سیستەمی سەرۆکاتیێ ل تورکیا ئاڤا کەت.
